फिलिपिन्सच्या दक्षिणेकडील समुद्रात आज (शुक्रवार) ७.६ रिश्टर स्केल तीव्रतेच्या एका शक्तिशाली भूकंपाने देश हादरला आहे. या भूकंपानंतर, प्रशासनाने तात्काळ त्सुनामीचा भीषण इशारा जारी केला असून, किनारपट्टीवरील नागरिकांना सुरक्षित आणि उंच ठिकाणी जाण्याचे आदेश दिले आहेत.

अमेरिकेच्या भूवैज्ञानिक सर्वेक्षणानुसार (USGS), या भूकंपाचे केंद्र मिंडानाओ बेटाच्या दक्षिणेकडील समुद्रात ६३ किलोमीटर खोलीवर होते. भूकंपाची तीव्रता इतकी होती की, मिंडानाओ बेटासह संपूर्ण दक्षिण फिलिपिन्समध्ये जोरदार धक्के जाणवले. अनेक लोक घाबरून आपल्या घरातून आणि इमारतींमधून बाहेर रस्त्यावर आले.

या शक्तिशाली भूकंपानंतर, पॅसिफिक त्सुनामी चेतावणी केंद्राने फिलिपिन्स, इंडोनेशिया आणि जपानच्या काही भागांमध्ये त्सुनामीच्या उंच लाटा उसळण्याचा इशारा दिला आहे. "एक मीटरपेक्षा उंच लाटा किनाऱ्यावर धडकू शकतात," असे या इशाऱ्यात म्हटले आहे.

फिलिपिन्सच्या आपत्ती व्यवस्थापन विभागाने (PHIVOLCS) दक्षिणेकडील किनारपट्टी भागातील लोकांना तात्काळ आपली घरे सोडून उंच आणि सुरक्षित ठिकाणी आश्रय घेण्यास सांगितले आहे.

अद्याप भूकंपामुळे झालेल्या जीवित किंवा वित्तहानीबद्दल कोणतीही निश्चित माहिती समोर आलेली नाही, परंतु भूकंपाची तीव्रता पाहता मोठे नुकसान झाल्याची भीती व्यक्त केली जात आहे. प्रशासन सध्या परिस्थितीवर लक्ष ठेवून असून, बचावकार्य सुरू करण्याच्या तयारीत आहे.