पाकिस्तानची राजधानी इस्लामाबादमधील एका प्रार्थनास्थळात आत्मघाती बॉम्बरने स्वतःला उडवून दिल्याने किमान ६९ लोकांचा मृत्यू झाला असून १६९ जण जखमी झाले आहेत. शहरातील शहजाद टाऊन परिसरातील तरलाई इमामबारगा येथे हा स्फोट झाला. पाकिस्तानी माध्यमांनी दिलेल्या वृत्तानुसार, एका आत्मघाती हल्लेखोराने दुपारी शिया प्रार्थनास्थळाच्या मुख्य प्रवेशद्वारावर स्फोटकांचा स्फोट घडवून आणला. सुरक्षा अधिकाऱ्यांच्या हवाल्याने म्हटले आहे की, प्रवेशद्वारावरील सतर्क रक्षकांनी हल्लेखोराला रोखल्याचे दिसते. यामुळे भाविक जमलेल्या मुख्य हॉलमध्ये त्याला प्रवेश करता आला नाही.
हल्लेखोराला रोखले गेले असले तरी स्फोटाच्या ठिकाणच्या व्हिडिओ फुटेजवरून या स्फोटाने प्रवेशद्वाराच्या संरचनेचे प्रचंड नुकसान झाले आहे. स्फोटामुळे शेजारच्या इमारतींच्या खिडक्यांच्या काचा फुटल्या असून रस्त्यावर ढिगारा विखुरला गेला आहे. व्हिडिओमध्ये मृतदेह आणि छिन्नविच्छिन्न झालेले अवयव देखील दिसत आहेत. स्फोटानंतर इस्लामाबादच्या पोलीस महानिरीक्षकांनी शहरात आणीबाणी जाहीर केली. मृतांची संख्या वाढण्याची भीती असल्याने बचाव आणि कायदा अंमलबजावणी पथके तातडीने घटनास्थळी दाखल झाली आहे.
जखमींना पाकिस्तान इन्स्टिट्यूट ऑफ मेडिकल सायन्सेस (PIMS) आणि पॉलिक्लिनिक रुग्णालयात हलवण्यात येत आहे. ही घटना ११ नोव्हेंबर २०२५ रोजी इस्लामाबादमधील जिल्हा आणि सत्र न्यायालय इमारतीबाहेर झालेल्या आत्मघाती स्फोटानंतर तीन महिन्यांच्या आत घडली आहे. त्या स्फोटात १२ लोक ठार झाले होते आणि ३० पेक्षा जास्त लोक जखमी झाले होते.
पाकिस्तानच्या पंतप्रधानांची प्रतिक्रिया
पाकिस्तानची राजधानी इस्लामाबादमध्ये शुक्रवारी एका शिया मशिदीत झालेल्या स्फोटाचा पंतप्रधान शाहबाज शरीफ यांनी निषेध केला आहे. या हल्ल्यात किमान ६९ लोकांचा बळी गेला आहे. पंतप्रधानांनी या स्फोटाबद्दल गहिरे दुःख व्यक्त केले असून या घटनेचा तीव्र निषेध केला आहे. या स्फोटात किमान ८० लोक जखमी झाले असल्याचे एका निवेदनात म्हटले आहे.
.jpeg)
