इस्रायल-हमासमध्ये झालेल्या युद्धविराम करारानंतर, तब्बल दोन वर्षांनी उत्तर गाझामध्ये शांतता पसरली आहे. बॉम्ब आणि गोळ्यांचा आवाज थांबताच, विस्थापित झालेले हजारो पॅलेस्टिनी नागरिक आपल्या घरांच्या ओढीने परतत आहेत. मात्र, जिथे एकेकाळी त्यांची घरं होती, तिथे आता फक्त उद्ध्वस्त झालेल्या इमारतींचे ढिगारे दिसत आहेत, ज्यामुळे त्यांच्या डोळ्यात आनंद आणि दुःख एकाच वेळी दाटून येत आहे.
शुक्रवारी युद्धविराम लागू होताच, दक्षिण गाझामध्ये आश्रय घेतलेले हजारो पॅलेस्टिनी नागरिक पायी, गाढवांवर आणि मिळेल त्या वाहनाने उत्तर गाझाकडे धाव घेऊ लागले. पण आपल्या परिसरात परतल्यावर त्यांना दिसले ते फक्त बॉम्बहल्ल्यांनी जमीनदोस्त झालेले त्यांचे शहर. अनेकजण आपल्या घरांच्या ढिगाऱ्यांवर बसून अश्रू ढाळत होते, तर काहीजण आपल्या आठवणी आणि सामान शोधण्याचा अयशस्वी प्रयत्न करत होते.
"माझं घर कुठे होतं, हेही आता ओळखता येत नाहीये," अशी भावना एका पॅलेस्टिनी नागरिकाने व्यक्त केली. या युद्धात हजारो पॅलेस्टिनी मारले गेले आणि बहुतांश लोकसंख्या विस्थापित झाली.
या करारानुसार, येत्या काही दिवसांत हमास सर्व बंधकांची सुटका करणार आहे आणि त्या बदल्यात इस्रायल सुमारे २००० पॅलेस्टिनी कैद्यांना सोडणार आहे. संयुक्त राष्ट्रांनाही आता गाझामध्ये मोठ्या प्रमाणात मानवतावादी मदत पोहोचवण्याची परवानगी मिळाली आहे.
मात्र, इस्रायलने स्पष्ट केले आहे की, जर हमासने शस्त्रे खाली ठेवली नाहीत, तर लष्करी कारवाई पुन्हा सुरू होऊ शकते. त्यामुळे, ही शांतता किती काळ टिकेल, यावर प्रश्नचिन्ह कायम आहे.
