एव्हियन-लेस-बेन्स 

फ्रान्समधील 'जी-७' शिखर परिषदेच्या निमित्ताने पंतप्रधान नरेंद्र मोदी यांनी युएईचे अध्यक्ष शेख मोहम्मद बिन झायेद अल नाह्यान यांची भेट घेतली. या भेटीत दोन्ही नेत्यांनी पश्चिम आशियातील सद्यस्थितीवर सविस्तर चर्चा केली. या प्रदेशात शांतता आणि स्थिरता प्रस्थापित करण्यासाठी संवाद, मुत्सद्देगिरी आणि आंतरराष्ट्रीय कायद्यांचा सन्मान करणे महत्त्वाचे असल्याचे त्यांनी अधोरेखित केले.

धोरणात्मक भागीदारीला नवी चालना

पंतप्रधान मोदींनी या भेटीला 'खूप चांगली' असे संबोधत, भारत-यूएई धोरणात्मक भागीदारी अधिक बळकट करण्यावर चर्चा झाल्याचे सांगितले. जानेवारी महिन्यात अध्यक्ष अल नाह्यान यांची भारत भेट आणि मे महिन्यात पंतप्रधान मोदींची यूएई भेट, त्यानंतर झालेली ही तिसरी महत्त्वाची चर्चा आहे. तंत्रज्ञान, व्यापार, गुंतवणूक, ऊर्जा आणि संरक्षण या क्षेत्रांतील प्रगतीचा यावेळी आढावा घेण्यात आला.

सागरी वाहतुकीची सुरक्षा आणि ब्रिक्स निमंत्रण

हॉर्मुझच्या सामुद्रधुनीतून होणारी व्यापार आणि सागरी वाहतूक कोणत्याही अडथळ्याशिवाय, सुरक्षितपणे सुरू राहावी, यावर दोन्ही नेत्यांनी भर दिला. पश्चिम आशियातील अलीकडील संघर्षाच्या पार्श्वभूमीवर हा मुद्दा अत्यंत महत्त्वाचा मानला जात आहे. याशिवाय, पंतप्रधान मोदींनी यूएईचे अध्यक्ष अल नाह्यान यांना भारताद्वारे आयोजित करण्यात येणाऱ्या 'ब्रिक्स' शिखर परिषदेसाठी उपस्थित राहण्याचे निमंत्रण दिले आहे.

पंतप्रधान मोदींनी फ्रान्सच्या दौऱ्यात यूएईच्या अध्यक्षांव्यतिरिक्त दक्षिण कोरियाचे अध्यक्ष ली जे-म्युंग, इजिप्तचे राष्ट्राध्यक्ष अब्देल फताह अल-सिसी, जपानच्या पंतप्रधान सने ताकाइची आणि केनियाचे राष्ट्राध्यक्ष विल्यम रुटो यांचीही भेट घेतली. या भेटींतून भारताचा 'ग्लोबल साऊथ' देशांशी असलेला संवाद अधिक दृढ होत असल्याचे दिसून येत आहे.