अमेरिकेचे अध्यक्ष डोनाल्ड ट्रम्प यांनी एक मोठा दावा करून खळबळ उडवून दिली आहे. ९/११ च्या भीषण दहशतवादी हल्ल्याच्या तब्बल एक वर्ष आधीच, आपण ओसामा बिन लादेनपासून असणाऱ्या धोक्याचा इशारा दिला होता, असे त्यांनी म्हटले आहे. "त्यावेळी माझ्या इशाऱ्याकडे दुर्लक्ष केले गेले," असेही ते म्हणाले.

एका मुलाखतीत बोलताना ट्रम्प यांनी सांगितले की, २००० साली प्रकाशित झालेल्या त्यांच्या 'द अमेरिका वुई डिझर्व्ह' (The America We Deserve) या पुस्तकात त्यांनी ओसामा बिन लादेनला "एक मोठा धोका" म्हटले होते. त्यांनी दावा केला की, "मी लिहिले होते की, आपल्याला ओसामाला आताच संपवावे लागेल. तो एक मोठी समस्या आहे. पण माझ्याकडे कोणीही लक्ष दिले नाही."

ट्रम्प पुढे म्हणाले, "आता मला याचे श्रेय घ्यावे लागेल. मी हल्ल्याच्या एक वर्ष आधीच धोक्याची सूचना दिली होती. जर त्यांनी माझे ऐकले असते, तर आज वर्ल्ड ट्रेड सेंटरचे टॉवर उभे असते आणि हजारो निष्पाप लोकांचे प्राण वाचले असते."

९/११ च्या हल्ल्याला अनेक वर्षे उलटून गेल्यानंतर, ट्रम्प यांनी केलेल्या या दाव्यामुळे अमेरिकेच्या राजकारणात आणि माध्यमांमध्ये पुन्हा एकदा त्या काळातील सुरक्षा यंत्रणांच्या भूमिकेवर चर्चा सुरू झाली आहे.