केंद्रीय शिक्षण मंत्री धर्मेंद्र प्रधान यांच्या उपस्थितीत पार पडलेल्या बैठकीतील दृश्य
केंद्रीय शिक्षण मंत्री धर्मेंद्र प्रधान यांनी आगामी नीट-युजी (NEET-UG) पुनर्परीक्षेच्या पूर्वतयारीचा आढावा घेण्यासाठी बुधवारी केंद्रीय सुरक्षा आणि गुप्तचर यंत्रणांसोबत एक उच्चस्तरीय बैठक घेतली. ३ मे रोजी झालेली नीट परीक्षा पेपर फुटीच्या आरोपांमुळे राष्ट्रीय चाचणी संस्थेने (NTA) रद्द केली होती. आता २१ जून रोजी ही पुनर्परीक्षा होणार असून ती अत्यंत सुरक्षित, पारदर्शक आणि निर्दोष वातावरणात पार पाडण्यासाठी शिक्षण मंत्र्यांनी सुरक्षा यंत्रणांना सज्ज राहण्याचे आदेश दिले आहेत. या बैठकीला शिक्षण मंत्रालयाचे वरिष्ठ अधिकारी आणि एनटीएचे महासंचालक उपस्थित होते.
सोशल मीडिया आणि टेलीग्राम चॅनेल्सवर कडक पाळत
बैठकीदरम्यान केंद्रीय शिक्षण मंत्र्यांनी सोशल मीडिया विशेषतः टेलीग्रामवर वैद्यकीय प्रवेश परीक्षेशी संबंधित अफवा आणि खोटी माहिती पसरवणाऱ्या बनावट चॅनेल्सवर तातडीने आणि कडक कारवाई करण्याचे निर्देश दिले. समांतर पातळीवर मेटा (Meta), गुगल (Google) आणि टेलीग्राम (Telegram) च्या प्रतिनिधींसोबतही एक बैठक घेण्यात आली.
स्पर्धा परीक्षांच्या काळात पेपर फुटीचे खोटे दावे करणे, क्लिकबेट कंटेंट्स आणि पडताळणी न केलेली माहिती पसरवून विद्यार्थी आणि पालकांमध्ये भीतीचे वातावरण निर्माण करणाऱ्या निनावी ग्रुप्सबद्दल अधिकाऱ्यांनी तीव्र चिंता व्यक्त केली.
गुप्तचर यंत्रणांचा तातडीने कारवाईचा इशारा
गुप्तचर यंत्रणांनी दिलेल्या माहितीनुसार, अनेक संशयास्पद टेलीग्राम चॅनेल्स मर्यादित फोन नंबरवरून चालवले जात असून ही एक संघटित टोळी असल्याचे समोर आले आहे. या चॅनेल्सच्या लिंक्स युजर्सना ऑटोमेटेड बॉट्स आणि फेक ग्रुप्सकडे वळवतात. याची गंभीर दखल घेत धर्मेंद्र प्रधान यांनी परीक्षांपूर्वी अशी खोटी माहिती आणि अपप्रचार पसरवणारी नेटवर्क शोधून त्यांचे चॅनेल्स ब्लॉक करण्याचे आदेश दिले आहेत. परीक्षा पद्धतीची अखंडता राखणे आणि विद्यार्थ्यांना दिशाभूल करणाऱ्या नरेटिव्ह्जपासून वाचवणे ही सरकारची सर्वोच्च प्राथमिकता असल्याचे त्यांनी स्पष्ट केले. सध्या या संपूर्ण प्रकरणाचा तपास सीबीआय (CBI) करत आहे.
.jpeg)
