जम्मूच्या कटरा येथील श्री माता वैष्णोदेवी इन्स्टिट्यूट ऑफ मेडिकल एक्सलन्स (SMVDIME) या वैद्यकीय महाविद्यालयाचा प्रवास सुरू होण्यापूर्वीच संपला आहे. राजकारणाने या संस्थेचा बळी घेतला असून, येथील विद्यार्थ्यांनी आता या महाविद्यालयाला कायमचा निरोप दिला आहे. नॅशनल मेडिकल कमिशनने (NMC) या महाविद्यालयाची मान्यता रद्द करण्याचा निर्णय घेतला आहे. यामुळे येथे प्रवेश घेतलेल्या विद्यार्थ्यांना आता आपले सामान आवरून इतरत्र जावे लागत आहे.
एनएमसीने २०२५-२६ या शैक्षणिक वर्षासाठी या महाविद्यालयाला एमबीबीएस अभ्यासक्रमासाठी दिलेली परवानगी मागे घेतली आहे. आयोगाने या कारवाईमागे किमान निकषांची पूर्तता न करणे आणि त्रुटी हे अधिकृत कारण दिले आहे. मात्र, या निर्णयामागे मोठे राजकारण असल्याचे स्पष्टपणे दिसून येत आहे. यावर्षी महाविद्यालयात प्रवेश घेतलेल्या ५० विद्यार्थ्यांपैकी ४० हून अधिक विद्यार्थी हे मुस्लिम समुदायाचे होते. या गोष्टीला काही स्थानिक संघटनांनी तीव्र विरोध दर्शवला होता.
जम्मू-काश्मीरमधील भाजप आणि काही हिंदुत्ववादी संघटनांनी या प्रवेशांवर जोरदार निदर्शने केली होती. हे महाविद्यालय माता वैष्णोदेवी श्राइन बोर्डाच्या निधीतून चालवले जाते, त्यामुळे येथे हिंदू विद्यार्थ्यांनाच प्रवेश मिळावा किंवा त्यांना प्राधान्य मिळावे, अशी मागणी आंदोलकांनी लावून धरली होती. या वादग्रस्त पार्श्वभूमीवर आणि एनएमसीच्या तपासणीनंतर अचानक मान्यता रद्द करण्याचा निर्णय जाहीर करण्यात आला.
विद्यार्थ्यांसाठी हा क्षण अत्यंत वेदनादायी आणि धक्कादायक ठरला आहे. मोठ्या कष्टाने NEET परीक्षा उत्तीर्ण करून त्यांनी या प्रतिष्ठित संस्थेत प्रवेश मिळवला होता. आता त्यांना आपले वसतिगृह आणि वर्ग सोडून जावे लागत आहे. प्रशासनाने या विद्यार्थ्यांना इतर सरकारी वैद्यकीय महाविद्यालयांमध्ये सामावून घेण्याचे आश्वासन दिले आहे. मात्र, एका जागतिक दर्जाच्या सुविधा असलेल्या संस्थेचे दरवाजे आपल्यासाठी बंद झाल्याची खंत विद्यार्थ्यांच्या मनात कायम आहे.
जम्मू-काश्मीरचे मुख्यमंत्री ओमर अब्दुल्ला यांनी या संपूर्ण घडामोडीवर तीव्र नाराजी व्यक्त केली आहे. "एकीकडे काही लोक महाविद्यालयाची मान्यता रद्द झाल्याचा आनंद साजरा करत आहेत, तर दुसरीकडे जम्मूने एक उत्तम वैद्यकीय संस्था गमावली आहे," असे परखड मत त्यांनी व्यक्त केले. "आम्ही विद्यार्थ्यांचे शैक्षणिक नुकसान होऊ देणार नाही आणि त्यांना त्यांच्या घराजवळील इतर सरकारी महाविद्यालयांमध्ये जागा देऊ," असे आश्वासनही त्यांनी दिले. परंतु, जम्मूच्या वाट्याला आलेले हे मेडिकल कॉलेज आता केवळ राजकारणामुळे इतिहासजमा झाले आहे.
.jpg "प्रातिनिधिक फोटो")
.jpg "प्रातिनिधिक फोटो")
.jpg "एशियन इनोव्हेशन मॉडर्न स्कूल (AIMS) मधील विद्यार्थी")
