अक्किनेनी कुटुंबात लवकरच सनई-चौघडे वाजणार आहेत. यानिमित्ताने ज्येष्ठ अभिनेत्री अमला अक्किनेनी यांनी आपल्या होणाऱ्या सुनेबद्दल मनमोकळेपणाने संवाद साधला. आपली होणारी सून झैनब रावदजी हिचे त्यांनी स्वागत केले. झैनबच्या येण्याने त्यांच्या हिंदू घरात इस्लाम धर्माची एक नवी आणि संवेदनशील बाजू समजून घेता येईल, असे मत त्यांनी व्यक्त केले.

अक्किनेनी कुटुंब हे आधीपासूनच विविध संस्कृतींचा मिलाफ राहिले आहे. अमला यांनी स्वतःच्या पार्श्वभूमीबद्दल सांगितले. त्या म्हणाल्या, "माझी आई आयरिश होती आणि वडील बंगाली होते. माझे पती नागार्जुन हे तेलुगू हिंदू आहेत. आता आमची होणारी सून झैनब ही मुस्लीम आहे. तिसऱ्या पिढीतील या विवाहामुळे आमच्या घरात इस्लाम संस्कृतीचा प्रवेश होईल. ही गोष्ट आमच्या घराला अधिक सर्वसमावेशक आणि समृद्ध बनवेल."

यावेळी अमला यांनी त्यांचे सासरे आणि तेलुगू चित्रपटसृष्टीतील दिग्गज अभिनेते अक्किनेनी नागेश्वर राव (एएनआर) यांच्या पुरोगामी विचारांची आठवण करून दिली. एएनआर यांचा कोणत्याही संस्थात्मक धर्मावर विश्वास नव्हता. ते स्वतःला 'माणूस' मानत असत. अमला यांनी सांगितले, "माझे सासरे धर्म मानत नव्हते. मुलांच्या शाळेच्या प्रवेश अर्जावर 'धर्म' आणि 'जात' या रकान्यात ते नेहमी प्रश्नचिन्ह टाकत असत. त्यांनी घरात कधीही पूजा-अर्चा किंवा धार्मिक विधींची सक्ती केली नाही. प्रत्येकाला आपल्या आवडीनुसार जगण्याचे स्वातंत्र्य त्यांनी दिले होते."

घरातील वातावरणाबद्दल बोलताना त्या म्हणाल्या की, त्यांच्या घरात सर्व धर्मांचे सण उत्साहात साजरे होतात. ख्रिसमस असो, संक्रांत असो किंवा दसरा, सर्वजण एकत्र येऊन आनंद लुटतात. आता यात ईदचाही समावेश होईल. अमला यांनी गमतीने सांगितले की, "मला स्वतःला बिर्याणी खूप आवडते. झैनबच्या येण्याने आता घरात उत्तम दर्जाची बिर्याणी आणि हैदराबादी संस्कृतीचा आस्वाद घेता येईल."

कुटुंबात या विविधतेमुळे कोणताही तणाव नसून उलट एकमेकांबद्दल आदर आणि प्रेम वाढले आहे. प्रेम हेच सर्व धर्मांपेक्षा श्रेष्ठ असल्याचे अक्किनेनी कुटुंबाचे मानणे आहे. झैनब रावदजी ही हैदराबादमधील प्रतिष्ठित रावदजी कुटुंबातील असून ती आणि अखिल अक्किनेनी लवकरच विवाहबंधनात अडकण्याची शक्यता आहे. अमला यांच्या या सकारात्मक भूमिकेचे सर्वत्र कौतुक होत आहे.