मुंबई 

रणबीर कपूर आणि साई पल्लवी यांच्या बहुप्रतिक्षित 'रामायण' (Ramayana) चित्रपटासाठी गाणे गाणे माझ्यासाठी एखाद्या स्वप्नपूर्तीसारखे आहे, अशी भावना प्रसिद्ध गायक अरमान मलिक याने व्यक्त केली आहे. या चित्रपटाच्या साऊंडट्रॅकसाठी ऑस्कर विजेते संगीतकार एआर रहमान आणि हँड्स झिमर यांनी एकत्र काम केले आहे. या दोघांसोबत जोडले जाणे हा एक अविश्वसनीय अनुभव असल्याचे अरमानने म्हटले आहे.

स्वप्नपूर्ती आणि रहमानचा विश्वास

विविध वृत्तसंस्थांना दिलेल्या मुलाखतीत अरमान मलिकने 'रामायण'च्या संगीताचा एक भाग होण्याबाबत आपल्या भावना व्यक्त केल्या. एआर रहमान आणि हँड्स झिमर हे जागतिक स्तरावर सिनेमाचा अनुभव बदलणारे दिग्गज आहेत, असे सांगत अरमान म्हणाला की, आपल्या भारतीय शास्त्रीय संगीताची पाळेमुळे जेव्हा अशा जागतिक पातळीवरील सिनेसंगीताशी जोडली जातात, तेव्हा तो एक स्वप्नपूर्तीचा क्षण असतो.

मुंबईत आंतरराष्ट्रीय प्रवासाला जाण्यापूर्वी त्याने हे गाणे रेकॉर्ड केले होते. एआर रहमानसोबत स्टुडिओमध्ये थेट भेट झाली नसली, तरी रहमानने त्याच्यावर दाखवलेला विश्वास हीच त्याच्यासाठी जगातील सर्वात मोठी पावती असल्याचे अरमानने नमूद केले.

कन्नड भाषेत गाण्याचा विशेष आनंद

या चित्रपटात अरमानने 'मंगल रंग' या गाण्याचे कन्नड व्हर्जन 'मंगला संगम' (Mangala Sangama) बिला शेंडे यांच्यासोबत गायले आहे. कन्नड भाषेत गाणे म्हणजे नेहमीच स्वतःच्या घरी असल्यासारखे वाटते, असे तो म्हणाला. याआधीही 'ओंडू मलबिल्लू' सारख्या गाण्यांना तिथल्या रसिकांनी भरभरून प्रेम दिले असून, आता 'मंगला संगम'मुळे मिळालेले प्रेम आपल्यासाठी कुटुंबासारखे असल्याचे त्याने स्पष्ट केले. 'रामायण' चित्रपट आगामी ५ नोव्हेंबर रोजी जगभरात प्रदर्शित होत आहे.