'धमाल ४' या नुकत्याच प्रदर्शित झालेल्या चित्रपटाच्या यशाचा आनंद घेत असलेले अभिनेते जावेद जाफरी यांनी त्यांच्या लोकप्रिय 'मानव' या पात्राबद्दल विशेष भाष्य केले आहे. हे पात्र जिवंत करण्यासाठी कपड्यांपासून, आवाजापासून ते देहबोलीपर्यंत प्रत्येक गोष्टीवर अत्यंत बारकाईने काम करावे लागले, असे त्यांनी सांगितले.
'धमाल ४'ची बॉक्स ऑफिसवर दमदार कमाई
इंद्र कुमार दिग्दर्शित 'धमाल' फ्रँचायझीमधील चौथा भाग १० जून रोजी चित्रपटगृहात प्रदर्शित झाला असून, या चित्रपटाने बॉक्स ऑफिसवर १४५ कोटी रुपयांपेक्षा जास्त कमाई केली आहे. या चित्रपटात जावेद जाफरी यांच्यासोबत अजय देवगण, रितेश देशमुख, अर्शद वारसी आणि संजय मिश्रा यांच्या मुख्य भूमिका आहेत. जावेद जाफरी यांनी या चित्रपटात अर्शद वारसीच्या (आदी) धाकट्या भावाची म्हणजेच निष्पाप 'मानव'ची भूमिका पुन्हा साकारली आहे. २००७ मध्ये प्रदर्शित झालेल्या पहिल्या भागापासून हे दोघे या फ्रँचायझीचा भाग आहेत.
अर्शद वारसीसोबतची मैत्री आणि 'मानव'ची निर्मिती
पीटीआयला दिलेल्या मुलाखतीत जावेद जाफरी म्हणाले, "अर्शद वारसीसोबत काम करणे नेहमीच सहज सोपे राहिले आहे, कारण आमची गेल्या अनेक दशकांची मैत्री आहे. तो १८ वर्षांचा असताना डान्सर म्हणून करिअर सुरू केल्यापासून मी त्याला ओळखतो."
पहिल्या चित्रपटातील भूमिकेबाबत दिग्दर्शक इंद्र कुमार यांच्या सल्ल्याची आठवण सांगताना ते म्हणाले, "इंदूजींनी मला सांगितले होते की, मानव हा लहान मुलासारखा, थोडा बावळट पण प्रामाणिक आहे. म्हणून मी त्याच्या लूकसाठी डुंगरी (Dungarees) वापरण्याचा विचार केला. ही भूमिका अतिशय लहान मुलासारखी वाटली पाहिजे, पण त्याचा अतिरेक होणार नाही असा तोल सांभाळणे गरजेचे होते. मी माझ्या आवाजातील बेस पूर्णपणे काढून टाकला आणि देहबोली थोडी झुकलेली ठेवली."
वडिलांकडून मिळालेला वारसा आणि मेहनत
वडील आणि दिग्गज अभिनेते-कॉमेडियन जगदीप यांच्याकडून मिळालेल्या विनोदी वारशाबद्दल बोलताना जाफरी म्हणाले, "अनुवंशिकता नक्कीच असते आणि त्यांना पाहत मोठे होण्याचा माझ्यावर प्रभाव पडला. पण केवळ नैसर्गिक प्रतिभा पुरेशी नसते, त्याला मेहनतीची जोड द्यावी लागते."
दरम्यान, 'धमाल ४' चित्रपटात संजीदा शेख, अंजली आनंद, उपेंद्र लिमये, विजय पाटकर आणि रवी किशन यांच्याही महत्त्वपूर्ण भूमिका आहेत.
_(1).jpg "फिरदोस खान")
.jpeg)
