अॅपल कंपनीने मेमरी चिप्सच्या वाढत्या खर्चामुळे जागतिक बाजारपेठेसह भारतातही आपल्या मॅकबुक (MacBook) आणि आयपॅड (iPad) मॉडेल्सच्या सुरुवातीच्या किमतीत तब्बल २० ते ४२ टक्क्यांपर्यंत मोठी वाढ केली आहे.
अॅपल इंडियाच्या अधिकृत वेबसाईटवरील नवीन किंमत सूचीनुसार, कंपनीने एम५ (M5) सिरीज चिपवर आधारित मॅकबुक प्रोच्या किमतीत सुमारे २० टक्क्यांनी वाढ केली आहे. या दरवाढीमुळे आता एम५ प्रो चिप असलेल्या १४ इंची मॅकबुक प्रोची किंमत २,४९,९०० रुपयांवरून थेट २,९९,९०० रुपये प्रति नग झाली आहे.
आयपॅड एअरच्या किमतीत सर्वाधिक वाढ
या नवीन दरवाढीमध्ये आयपॅड एअरच्या (iPad Air) किमतीत कमालीची वाढ झाली आहे. १३ इंची आयपॅड एअरच्या बेस मॉडेलच्या किमतीत ४१.२२ टक्क्यांची मोठी वाढ करण्यात आली असून, आता त्याची किंमत ८४,९०० रुपयांवरून थेट १,१९,९०० रुपये झाली आहे.
काउंटरपॉईंट रिसर्चचे को-फाउंडर नील शाह यांनी सांगितले की, मॅकबुक निओ, मॅकबुक एअर, मॅकबुक प्रो, आयपॅड एअर आणि आयपॅड प्रो वाय-फाय मधील ही दरवाढ सेमीकंडक्टर चिप्स आणि प्रोसेसरच्या किमती वाढल्यामुळे झाली आहे, ज्याने संपूर्ण पीसी आणि टॅबलेट मार्केटची रचना बदलून टाकली आहे.
एआय (AI) डेटा सेंटर्समुळे चिप्स तुटवडा
या संदर्भातील एका निवेदनात अॅपलने म्हटले आहे की, सध्या ग्राहक इलेक्ट्रॉनिक्स उद्योग एका अभूतपूर्व आव्हानाचा सामना करत आहे. एआय डेटा सेंटर्सच्या (AI Data Centers) वेगवान विस्तारामुळे मेमरी आणि स्टोरेजच्या मागणीत कमालीची वाढ झाली आहे. एकाच वेळी घटकांच्या किमतीत इतकी मोठी आणि वेगाने झालेली वाढ यापूर्वी कधीही पाहिली नव्हती.
आतापर्यंत आम्ही आमच्या ग्राहकांना या दरवाढीपासून वाचवले होते, परंतु आता आम्हाला आयपॅड आणि मॅकसह अनेक उत्पादनांच्या किमती वाढवणे भाग पडले आहे. ही चांगली बातमी नसली तरी आम्ही यावर सतत तोडगा काढण्यासाठी काम करत आहोत.
उद्योग विश्लेषकांच्या मते, मेमरी कंपन्या आपल्या उत्पादनाचा मोठा हिस्सा एआय डेटा सेंटर्ससाठी पुरवत आहेत, ज्यामुळे ग्राहक इलेक्ट्रॉनिक्स क्षेत्रासाठी चिप्सची उपलब्धता कमी झाली असून खर्च वाढला आहे. मायक्रॉनसारख्या आघाडीच्या मेमरी चिप कंपनीने ८६ टक्के इतका विक्रमी नफा नोंदवला आहे, जो गेल्या वर्षी अवघा १५ टक्के होता.
सायबरमीडिया रिसर्चचे प्रभू राम यांच्या मते, पुरवठा साखळीत सर्वात मजबूत मानल्या जाणाऱ्या अॅपलने हा वाढलेला खर्च ग्राहकांवर टाकण्यास सुरुवात केली आहे, यावरून किंमतींचा दबाव किती वाढला आहे हे स्पष्ट होते.
.jpeg)
.jpg "पंतप्रधान नरेंद्र मोदी आणि नेदरलँड्सच्या राणी मॅक्सिमा यांची भेट")
