अटलांटिक महासागरात प्रवास करणाऱ्या एका क्रूझ जहाजावर दुर्मिळ मानल्या जाणाऱ्या 'हंटाव्हायरस'चा संसर्ग झाल्याने तीन प्रवाशांचा मृत्यू झाला आहे. यामध्ये एका वृद्ध दांपत्याचा समावेश आहे. याशिवाय किमान तीन जणांना या विषाणूची लागण झाली असून, जागतिक आरोग्य संघटना (WHO) आणि दक्षिण आफ्रिकेच्या आरोग्य विभागाने रविवारी या घटनेची पुष्टी केली. सध्या या आजाराचा सविस्तर तपास सुरू आहे.

हंटाव्हायरस म्हणजे काय?

हंटाव्हायरस हा जगभरात आढळणाऱ्या विषाणूंचा एक समूह आहे. याचा संसर्ग प्रामुख्याने उंदीर आणि घुशींसारख्या संक्रमित प्राण्यांच्या मूत्र किंवा विष्ठेच्या संपर्कात आल्याने होतो. अमेरिकेच्या 'सेंटर्स फॉर डिसीज कंट्रोल अँड प्रिव्हेंशन' (CDC) नुसार, हंटाव्हायरसमुळे फुफ्फुसांवर आणि मूत्रपिंडावर गंभीर परिणाम करणारे दोन गंभीर आजार होऊ शकतात. हा संसर्ग दुर्मिळ असला तरी तो एका व्यक्तीकडून दुसऱ्या व्यक्तीकडे पसरू शकतो, असे जागतिक आरोग्य संघटनेने म्हटले आहे. यावर अद्याप कोणताही विशिष्ट उपचार उपलब्ध नाही, परंतु वेळीच वैद्यकीय मदत मिळाल्यास रुग्णाचे प्राण वाचू शकतात.

जहाजावरील परिस्थिती आणि तपास

दक्षिण आफ्रिकेच्या आरोग्य विभागाने दिलेल्या माहितीनुसार, डच-झेंडा असलेले 'एमव्ही होंडियस' (MV Hondius) हे जहाज सुमारे तीन आठवड्यांपूर्वी अर्जेंटिनातून निघाले होते. अंटार्क्टिका आणि फॉकलंड बेटांना भेट देऊन हे जहाज स्पेनच्या कॅनरी बेटांवर जाणार होते. या संसर्गातील पहिला बळी ठरलेल्या ७० वर्षीय व्यक्तीचा मृत्यू जहाजावरच झाला. त्यांच्या पत्नीचा दक्षिण आफ्रिकेतील विमानतळावर कोसळून एका रुग्णालयात मृत्यू झाला. सध्या एक ब्रिटिश नागरिक जोहान्सबर्ग येथील रुग्णालयात अतिदक्षता विभागात (ICU) उपचार घेत आहे.

या जहाजावर सुमारे १५० प्रवासी होते. सध्या हे जहाज आफ्रिकेच्या पश्चिम किनाऱ्याजवळील केप वर्दे येथे थांबले असून, स्थानिक प्रशासनाने अद्याप कोणालाही खाली उतरण्याची परवानगी दिलेली नाही. जहाजावरील दोन आजारी कर्मचारी सदस्यांना तातडीच्या वैद्यकीय मदतीची गरज असल्याचे जहाज चालवणाऱ्या डच कंपनीने म्हटले आहे. जागतिक आरोग्य संघटना आणि संबंधित देशांचे आरोग्य विभाग या घटनेचा सविस्तर तपास करत असून संसर्ग आणखी पसरू नये यासाठी खबरदारी घेतली जात आहे.