भारताने काँगोमधील (DRC) इबोला उद्रेकाचा सामना करण्यासाठी तातडीची वैद्यकीय आणि औषधी मदत पाठवली आहे. आफ्रिका सेंटर्स फॉर डिसीज कंट्रोल अँड प्रिव्हेंशनने (Africa CDC) बुधवारी ही माहिती दिली. भारताने दान केलेली ही मदत युगांडामध्ये प्राप्त झाली असून ती काँगोच्या पूर्व भागातील प्रभावित समुदायांपर्यंत पोहोचवली जाणार आहे.

आफ्रिका 'सीडीसी'ने मानले भारताचे आभार

आफ्रिका सीडीसीने सोशल मीडियावरून दिलेल्या माहितीनुसार, या वैद्यकीय कुमकेमध्ये आवश्यक निदान साधने, उपचार आणि संसर्ग प्रतिबंधक साहित्याचा समावेश आहे. आफ्रिका सीडीसीने म्हटले आहे की, "काँगोच्या लोकशाही प्रजासत्ताकमध्ये सुरू असलेल्या इबोलाच्या उद्रेकाला तोंड देण्यासाठी भारत सरकार आणि जनतेने दिलेल्या या अत्यंत आवश्यक वैद्यकीय मदतीचे आम्ही स्वागत करतो." संपूर्ण आफ्रिका खंडातील आरोग्य सुरक्षा वाढवण्यासाठी आणि जीव वाचवण्यासाठी भारताने दाखवलेल्या निरंतर पाठिंब्याबद्दल त्यांनी भारताचे विशेष आभार मानले.

इबोलाचा वाढता धोका आणि जागतिक आरोग्य आणीबाणी

आफ्रिकेत पसरलेला 'बुंडिबुग्यो' (Bundibugyo) हा इबोला विषाणूच्या ज्ञात सहा प्रजातींपैकी एक आहे. जागतिक आरोग्य संघटनेच्या (WHO) माहितीनुसार, या विशिष्ट विषाणूवर सध्या कोणतीही मान्यताप्राप्त लस किंवा औषध उपलब्ध नाही. संक्रमित शारीरिक द्रव किंवा प्राण्यांच्या थेट संपर्कातून हा गंभीर आजार पसरतो. यात ताप, उलट्या, अतिसार आणि गंभीर प्रकरणांमध्ये अंतर्गत आणि बाह्य रक्तस्त्राव अशी लक्षणे दिसतात.

जागतिक आरोग्य संघटनेने १७ मे रोजी काँगो आणि युगांडामधील इबोला उद्रेकाला 'आंतरराष्ट्रीय चिंतेची सार्वजनिक आरोग्य आणीबाणी' म्हणून घोषित केले आहे. मंगळवारपर्यंत या आजाराचे १,००० हून अधिक संशयित रुग्ण आणि किमान २२० मृत्यूंची नोंद झाली आहे. युगांडामध्येही ७ जणांना लागण झाल्याची पुष्टी झाली आहे. मात्र, प्रत्यक्ष परिस्थिती याहूनही गंभीर असू शकते, अशी भीती मदत संस्थांनी व्यक्त केली आहे. कोरोना महामारीसारख्या जागतिक संकटाच्या वेळीही भारताने आफ्रिकन देशांना अशीच मोठी वैद्यकीय मदत पुरवली होती, ज्यामुळे दोन्ही देशांमधील आरोग्य आणि विकासाची भागीदारी अधिक दृढ झाली आहे.