अमरनाथ यात्रेसाठी जम्मू-श्रीनगर राष्ट्रीय महामार्गावर कडेकोट सुरक्षा; वरिष्ठ अधिकाऱ्यांकडून तयारीचा आढावा

Story by आवाज़ मराठी | Published by Bhakti Chalak • 10 h ago

अमरनाथ यात्रा २०२६ च्या पार्श्वभूमीवर जम्मू-श्रीनगर राष्ट्रीय महामार्गावरील सुरक्षा आणि पायाभूत सुविधांचा आढावा घेताना वरिष्ठ अधिकारी

आगामी ५७ दिवसीय ऐतिहासिक अमरनाथ यात्रेच्या पार्श्वभूमीवर जम्मू-काश्मीरमधील वरिष्ठ अधिकाऱ्यांनी जम्मू-श्रीनगर राष्ट्रीय महामार्गावरील सुरक्षा, पायाभूत सुविधा आणि भाविकांच्या इतर व्यवस्थांचा सविस्तर आढावा घेतला आहे. काश्मीर खोऱ्याकडे जाणाऱ्या हजारो भाविकांसाठी हा महामार्ग अत्यंत महत्त्वाचा आणि धोरणात्मक मार्ग आहे. वार्षिक अमरनाथ यात्रा येत्या ३ जुलैपासून सुरू होणार असून, यात्रेकरूंच्या सुरक्षेसाठी आणि सुविधेसाठी प्रशासन सर्व पातळ्यांवर पूर्वतयारी करत आहे.

जम्मूचे विभागीय आयुक्त रमेश कुमार आणि जम्मू परिमंडळाचे पोलीस महानिरीक्षक (IGP) भीम सेन तुती यांनी रामबन जिल्ह्यातील चंद्रकोट येथील यात्री निवासला भेट देऊन तेथील निवास व्यवस्था, स्वच्छता, पिण्याचे पाणी, वीज पुरवठा, वैद्यकीय सुविधा आणि सुरक्षा चोख ठेवण्याबाबत पाहणी केली.

राष्ट्रीय महामार्ग

विभागीय आयुक्तांनी रामबन जिल्ह्यातील नाशरी ते बनिहाल दरम्यान सुरू असलेल्या राष्ट्रीय महामार्ग-४४ च्या चौपदरीकरणाच्या कामाची प्रत्यक्ष पाहणी केली. तसेच चंद्रकोट आणि लांबर येथील यात्रा कॅम्पसह महामार्गावरील नियोजित लंगर स्थळांच्या व्यवस्थेचाही आढावा घेतला. रामबनचे जिल्हाधिकारी मोहम्मद इलियास खान यांनी अधिकाऱ्यांना ३,८८० मीटर उंचीवर असलेल्या पवित्र अमरनाथ गुहेच्या दर्शनासाठी येणाऱ्या भाविकांच्या व्यापक नियोजनाबाबत सविस्तर सादरीकरण केले.

चंद्रकोट येथील यात्री निवासातील सुविधांची पाहणी करताना विभागीय आयुक्त रमेश कुमार यांनी सर्व संबंधित विभागांना उर्वरित कामे २० जूनपूर्वी कोणत्याही परिस्थितीत पूर्ण करण्याचे निर्देश दिले आहेत. यामध्ये पुरेशा प्रमाणात फिरती शौचालये उभारणे, कचरा व्यवस्थापन, अखंडित वीज पुरवठा आणि लंगरची चोख व्यवस्था सुनिश्चित करण्यास सांगण्यात आले आहे.

आपत्ती व्यवस्थापन आणि सुरक्षा समन्वय

यात्रेदरम्यान उद्भवणाऱ्या कोणत्याही आपत्कालीन परिस्थितीला तोंड देण्यासाठी राज्य आपत्ती प्रतिसाद दलाने (SDRF) पूर्णपणे सज्ज राहावे, अशा सूचना अधिकाऱ्यांनी दिल्या आहेत. तसेच मुख्य ठिकाणी अग्निशामक दलाच्या गाड्या तैनात ठेवण्याचे आदेशही देण्यात आले आहेत. पहलगाम आणि बालटाल या दोन्ही मार्गांनी जाणाऱ्या यात्रेकरूंच्या ताफ्यांच्या वेळेचे आणि वाहतुकीचे नियोजन यावेळी तपासण्यात आले.

दिग्दोल-पनथियाल बोगद्याचे काम आणि मगरकोट-रामसू उड्डाणपुलाचे काम वेगाने पूर्ण करण्याचे निर्देश राष्ट्रीय महामार्ग प्राधिकरणाच्या (NHAI) प्रकल्प संचालकांना देण्यात आले आहेत. विभागीय आयुक्त आणि आयजीपी यांनी यात्रेच्या सुरक्षा व्यवस्थेबाबत सविस्तर चर्चा केली असून, सर्व यंत्रणांमध्ये समन्वय राखण्यावर भर दिला आहे.