महाराष्ट्रातील बारामती आणि राहुरी विधानसभा पोटनिवडणुकीसाठी गुरुवारी सकाळी मतदानाला सुरुवात झाली. सकाळी ७ वाजता मतदानाला प्रारंभ झाला असून ते संध्याकाळी ६ वाजेपर्यंत सुरू राहील, अशी माहिती निवडणूक अधिकाऱ्यांनी दिली.
बारामतीमधून निवडणूक लढवत असलेल्या महाराष्ट्राच्या उपमुख्यमंत्री सुनेत्रा पवार यांनी सहानुभूतीच्या लाटेवर स्वार होत मतदारांना आवाहन केले आहे. दिवंगत पती अजित पवार यांना आदरांजली म्हणून मला पाठिंबा द्यावा, असे त्यांनी मतदारांना सांगितले. तत्कालीन उपमुख्यमंत्री आणि राष्ट्रवादी काँग्रेसचे अध्यक्ष अजित पवार यांचा २८ जानेवारी रोजी विमान अपघातात मृत्यू झाल्याने ही पोटनिवडणूक होत आहे. बारामतीच्या रिंगणात सुनेत्रा पवार यांच्यासह एकूण २३ उमेदवार नशीब आजमावत आहेत. या मतदारसंघात एकूण नोंदणीकृत मतदारांची संख्या ३.८४ लाख इतकी आहे.
राहुरी पोटनिवडणुकीत भाजपचे अक्षय कर्डिले रिंगणात आहेत. त्यांच्यासमोर राष्ट्रवादी काँग्रेस (शरद पवार) पक्षाचे उमेदवार गोविंद मोकाटे आणि वंचित बहुजन आघाडीचे संतोष चळके यांचे आव्हान आहे. भाजप आमदार शिवाजी कर्डिले यांचे गेल्या वर्षी ऑक्टोबरमध्ये निधन झाल्याने राहुरीची जागा रिक्त झाली होती. अक्षय हे त्यांचे पुत्र आहेत.
महाराष्ट्र विधानसभेत एकूण २८८ जागा आहेत. सत्ताधारी महायुती आघाडीकडे २३५ जागा (भाजप-१३२, शिवसेना-५७, राष्ट्रवादी अजित पवार गट-४१, मित्रपक्ष-५) आहेत. तर विरोधी महाविकास आघाडीकडे ५० जागा (शिवसेना उद्धव बाळासाहेब ठाकरे-२०, काँग्रेस-१६, राष्ट्रवादी शरद पवार गट-१०, इतर-४) आहेत.