नवी दिल्ली
संयुक्त राष्ट्रसभेत (UN) पाकिस्तानने जम्मू-काश्मीरवर केलेल्या आक्षेपार्ह विधानांना भारताने अत्यंत सडेतोड उत्तर दिले आहे. भाजपच्या खासदार महिमा कुमारी मेवाड यांनी संयुक्त राष्ट्रांच्या महासभेच्या चौथ्या समितीत भारताचा 'राईट ऑफ रिप्लाय' सादर करताना, जम्मू-काश्मीर हा भारताचा नेहमीच अविभाज्य भाग राहिला असल्याचे ठणकावून सांगितले. तसेच पाकिस्तान आंतरराष्ट्रीय मंचावर खोटा प्रचार करत असल्याचा गंभीर आरोप त्यांनी केला.
सभेत बोलताना खासदार महिमा कुमारी मेवाड यांनी पाकव्याप्त प्रदेशांमधील मानवाधिकार उल्लंघनांचा मुद्दा जोरदारपणे मांडला. गेल्या काही महिन्यांत पाकिस्तानी लष्कर आणि त्यांच्या हितसंबंधांनी मूलभूत अधिकारांसाठी आंदोलन करणाऱ्या डझनभर निर्दोष नागरिकांची हत्या केल्याचा आरोप त्यांनी केला. पाकिस्तानमधील लष्करी हुकूमशाही, बनावट निवडणुका, लोकप्रिय नेत्यांना डांबून ठेवणे आणि धार्मिक मूलतत्त्ववाद या मुद्द्यांवरही त्यांनी कडक शब्दांत ताशेरे ओढले. ज्या देशात स्वतः मानवाधिकारांची पायमल्ली होती, त्यांनी इतर देशांना लोकशाहीचे धडे देऊ नये, असे भारताने स्पष्ट शब्दांत सुनावले.
संयुक्त राष्ट्रसंघाच्या विशेष राजनैतिक आणि राजकीय बाबी पाहणाऱ्या चौथ्या समितीत झालेल्या या चर्चेदरम्यान भारताने आपली सार्वभौमत्वाची भूमिका पुन्हा एकदा जगासमोर स्पष्ट केली. पाकिस्तानकडून वारंवार बहुपक्षीय मंचांवर काश्मीरचा मुद्दा उपस्थित केला जात असण्यावर भारताने तीव्र आक्षेप घेतला आहे. दरम्यान, खासदार महिमा कुमारी मेवाड या संयुक्त राष्ट्रसंघाच्या फॅमिलिरायझेशन कार्यक्रमांतर्गत न्यूयॉर्कला गेलेल्या १५ सदस्यीय भारतीय संसदीय शिष्टमंडळाचा भाग आहेत. या दौऱ्यात त्यांनी न्यूयॉर्कमधील भारतीय परराष्ट्र वसाहतीत डायस्पोराशीही संवाद साधला.
.jpeg)
