बीजिंग / शांघाय

भारताने रविवारी (७ डिसेंबर) चीनचे प्रमुख व्यापारी केंद्र असलेल्या शांघायमध्ये आपल्या नवीन आणि अत्याधुनिक वाणिज्य दूतावासाच्या इमारतीचे उद्घाटन केले. तब्बल ३२ वर्षांनंतर भारताने चीनमधील आपल्या या महत्त्वाच्या कार्यालयाचे स्थलांतर केले आहे, ज्यामुळे पूर्व चीनमधील भारतीय समुदायाला मोठा दिलासा मिळाला आहे.

चीनमधील भारताचे राजदूत प्रदीप कुमार रावत यांच्या हस्ते या भव्य 'चान्सरी'  इमारतीचे उद्घाटन करण्यात आले. हे कार्यालय सोमवार, ८ डिसेंबरपासून पूर्ण क्षमतेने कार्यरत होणार आहे.

भव्य आणि अत्याधुनिक इमारत

शांघायच्या चांगनिंग जिल्ह्यातील प्रसिद्ध 'डॉर्निंग सेंटर' मध्ये हे नवीन कार्यालय स्थित आहे. तब्बल १,४३६.६३ चौरस मीटर क्षेत्रफळावर पसरलेले हे कार्यालय जुन्या जागेपेक्षा आकाराने दुप्पट मोठे आहे.

राजदूत प्रदीप कुमार रावत यांनी या क्षणाचे महत्त्व विशद करताना सांगितले की, "१९९२ नंतर पहिल्यांदाच नवीन वाणिज्य दूतावास उघडले जात आहे. विशेष म्हणजे भारत आणि चीन यांच्यातील राजनैतिक संबंधांना ७५ वर्षे पूर्ण होत असताना हे घडत आहे, त्यामुळे हे वर्ष आपल्यासाठी खास आहे."

भारतीय व्यापाऱ्यांना होणार फायदा

शांघायमधील हे दूतावास पूर्व चीनमधील वाढत्या भारतीय व्यापारी समुदायासाठी अत्यंत महत्त्वाचे आहे. इवू  सारख्या जागतिक व्यापारी केंद्रांमध्ये मोठ्या संख्येने भारतीय व्यावसायिक आहेत. याशिवाय हँगझोऊ, निंगबो, सुझोऊ आणि नानजिंग यांसारख्या शहरांमधील भारतीयांनाही या कार्यालयाचा लाभ मिळेल.

उद्घाटन सोहळ्याला ४०० हून अधिक पाहुणे उपस्थित होते. यामध्ये राजनैतिक अधिकारी, शांघाय महानगरपालिकेचे प्रतिनिधी आणि शांघायसह आसपासच्या शहरांमधील भारतीय डायस्पोरा (अनिवासी भारतीय) यांचा समावेश होता.

'सबका साथ, सबका विकास'चे प्रतिबिंब

महावाणिज्य दूत प्रतीक माथूर यांनी सांगितले की, हे नवीन कार्यालय पंतप्रधान नरेंद्र मोदींच्या 'सबका साथ, सबका विकास' या दृष्टिकोनाशी सुसंगत आहे.

"एकाच सुरक्षित आणि आधुनिक मजल्यावर आता वाणिज्य, सांस्कृतिक आणि प्रशासकीय कामकाज चालणार आहे. यामुळे भारतीय नागरिक आणि चिनी भागीदारांना अधिक कार्यक्षमतेने आणि अखंडित सेवा देणे शक्य होईल," असे माथूर यांनी स्पष्ट केले.

द्विपक्षीय संबंधांना गती

माथूर यांनी भारत आणि शांघाय दरम्यान नुकत्याच सुरू झालेल्या थेट विमानसेवेचाही उल्लेख केला. ते म्हणाले, "आम्ही एका सुंदर नवीन अध्यायात प्रवेश करत आहोत. ही इमारत केवळ एक कार्यालय नसून, भारत आणि पूर्व चीनमधील मैत्री, व्यापार आणि संस्कृतीचे एक जिवंत केंद्र बनावे, अशी आमची इच्छा आहे."

होंग्कियाओ ट्रान्सपोर्टेशन हब आणि गुबेई इंटरनॅशनल कम्युनिटीच्या जवळ असल्याने हे कार्यालय धोरणात्मकदृष्ट्या अत्यंत मोक्याच्या ठिकाणी आहे, असेही त्यांनी नमूद केले.