उत्तराखंडमधील रुद्रप्रयाग जिल्ह्यातील मुनकटिया येथे अचानक झालेल्या मोठ्या दरड दुर्घटनेमुळे केदारनाथ यात्रा मार्गावर अडकलेल्या तब्बल १०,४५० भाविकांना संयुक्त मदत आणि बचाव पथकांनी अत्यंत सुरक्षितपणे बाहेर काढले आहे. या भागात झालेल्या मुसळधार पावसामुळे मंगळवारी उशिरा रात्री सोनप्रयाग आणि गौरीकुंड दरम्यान अचानक डोंगराचा भाग आणि ढिगारा मुख्य महामार्गावर आला. यामुळे संपूर्ण रस्ता बंद झाला आणि केदारनाथ दर्शनासाठी निघालेले हजारो भाविक तिथेच अडकून पडले होते.
अंधार आणि मुसळधार पावसात बचाव कार्य
डोंगरावरून सातत्याने कोसळणारे दगड, मुसळधार पाऊस, रात्रीचा दाट अंधार आणि दुर्गम डोंगराळ भाग यामुळे अडकलेल्या प्रवाशांसाठी परिस्थिती अत्यंत कठीण आणि धोकादायक बनली होती. रुद्रप्रयाग जिल्हा नियंत्रण कक्षाने रात्री ९.१६ वाजता राज्य आपत्ती प्रतिसाद दलाला (SDRF) या घटनेची माहिती दिली. सोनप्रयाग येथील बचाव पथकाने आवश्यक उपकरणांसह तातडीने घटनास्थळाकडे धाव घेतली. त्यानंतर राष्ट्रीय आपत्ती प्रतिसाद दल (NDRF) आणि SDRF ने संयुक्तपणे युद्धपातळीवर मदत आणि बचाव मोहीम सुरू केली.
हायवेवरील ढिगारा हटवून वाहतूक पूर्ववत
अत्यंत कमी दृश्यमानता आणि सतत होणाऱ्या पावसातही दोन्ही सुरक्षा दलांच्या जवानांनी भाविकांना धीर देत या धोकादायक टप्प्यातून सुरक्षितपणे बाहेर काढले. सुरक्षित स्थलांतर केल्यानंतर सर्व भाविकांना प्रशासनाने निश्चित केलेल्या सुरक्षित ठिकाणी हलवले आहे. भाविकांना सुरक्षित बाहेर काढल्यानंतर प्रशासनाने महामार्गावरील ढिगारा उपसण्यासाठी तातडीने जेसीबी यंत्रे तैनात केली. काही तासांच्या अथक परिश्रमानंतर रस्ता साफ करण्यात आला असून महामार्गावरील वाहनांची वाहतूक आता पूर्ववत करण्यात आली आहे. यात्रा मार्गावरील सर्व सुरक्षा चौक्यांना हाय अलर्टवर ठेवण्यात आल्याची माहिती एसडीआरएफचे कमांडंट अर्पण यदुवंशी यांनी दिली.
.jpg "मुस्लिम धर्मगुरू, नेते, वकील आणि सामाजिक कार्यकर्त्यांच्या बैठकीतील दृश्य")
.jpeg)
