मणिपूरचे पोलीस महासंचालक (DGP) मुकेश सिंग यांनी कायदा आणि सुव्यवस्था राखण्यासाठी तसेच सर्वांसाठी सुरक्षित वातावरण निर्माण करण्यासाठी नागरिकांनी पोलिसांना सहकार्य करण्याचे आवाहन केले आहे. त्यांनी रविवारी कांगपोकपी आणि सेनापती जिल्ह्यांना पहिल्यांदाच भेट दिली, जिथे त्यांनी कुकी आणि नागा नागरी समाज संघटनांशी (CSO) संवाद साधला.
या महत्त्वपूर्ण भेटीदरम्यान, पोलीस महासंचालकांना सद्यस्थिती, सुरक्षा उपाय आणि पोलिसांच्या प्रमुख कामगिरीची माहिती देण्यात आली. त्यांनी जिल्हा पोलीस दलांच्या एकूण कामकाजाचा आणि पूर्वतयारीचा आढावा घेतला. तसेच जिल्हा प्रशासनातील वरिष्ठ अधिकारी आणि केंद्रीय सशस्त्र पोलीस दलाच्या (CAPF) कमांडर्सशीही चर्चा केली.
"प्रत्येक प्रकरण निष्पक्षपणे हाताळावे, अशी माझी पोलीस कर्मचाऱ्यांना सक्त सूचना आहे. कायद्याचे उल्लंघन करणाऱ्यांवर अत्यंत कठोर कारवाई केली जाईल," असे सिंग यांनी रविवारी संध्याकाळी पत्रकारांशी बोलताना स्पष्ट केले. पोलीस कोणत्याही भीती किंवा दबावाशिवाय लोकांची सेवा करत राहतील, याचा पुनरुच्चार त्यांनी यावेळी केला.
संशयित सशस्त्र गटांनी किमान २० जणांना ओलीस ठेवल्याचा आरोप असून त्यांच्या सुटकेसाठी सध्या युद्धपातळीवर प्रयत्न सुरू आहेत. या घटनेमुळे नागा आणि कुकी समुदायांमध्ये तणाव निर्माण झाला आहे. याच पार्श्वभूमीवर पोलीस महासंचालकांनी कांगपोकपी आणि सेनापती जिल्ह्यांना दिलेली ही भेट अत्यंत महत्त्वाची मानली जात आहे. मणिपूरमध्ये मे २०२३ पासून मैतेई आणि कुकी समुदायांमध्ये उसळलेल्या हिंसक घटनांमध्ये किमान २६० लोकांचा मृत्यू झाला आहे, तर हजारो लोक विस्थापित झाले आहेत.
.jpeg)
