७९ व्या स्वातंत्र्य दिनानिमित्त लाल किल्ल्यावरून आपले १२ वे भाषण करताना, पंतप्रधान नरेंद्र मोदी यांनी भारताच्या प्रगतीच्या पुढील अध्यायाचा शुभारंभ केला. त्यांनी केलेल्या अनेक धाडसी घोषणांमधून, २०४७ पर्यंत विकसित राष्ट्र बनण्याच्या दिशेने झेप घेण्यासाठी सज्ज असलेल्या भारताची आकांक्षा दिसून आली.
'मेड इन इंडिया' सेमीकंडक्टर चिप बनवण्यापासून ते जेट इंजिन तयार करण्यापर्यंत आणि अणुऊर्जेचा दहापट विस्तार करण्यापासून ते १ लाख कोटी रुपयांच्या युवा रोजगार योजनेपर्यंत, पंतप्रधानांचा संदेश स्पष्ट होता: 'भारत आपले नशीब स्वतःच ठरवेल, आपल्या अटी स्वतःच निश्चित करेल'.
पंतप्रधानांच्या भाषणातील प्रमुख घोषणा:
सेमीकंडक्टरमध्ये 'मिशन मोड'वर काम
पंतप्रधानांनी आठवण करून दिली की, ५०-६० वर्षांपूर्वी सेमीकंडक्टर कारखाने उभारण्याचे प्रयत्न कसे अयशस्वी झाले. ते म्हणाले की, आता भारत या क्षेत्रात 'मिशन मोड'वर काम करत आहे आणि या वर्षाच्या अखेरीस देशातील पहिली 'मेड इन इंडिया' चिप तयार होईल.
अणुऊर्जा क्षमतेत दहापट वाढ
पुढील दोन दशकांत अणुऊर्जा निर्मिती क्षमता दहा पटीने वाढवण्याच्या भारताच्या मोहिमेअंतर्गत १० नवीन अणुभट्ट्यांवर काम सुरू आहे, अशी घोषणा पंतप्रधानांनी केली.
GST सुधारणा: दिवाळीची भेट
दिवाळीच्या मुहूर्तावर नवीन पिढीच्या जीएसटी सुधारणा जाहीर केल्या जातील. यामध्ये जीवनावश्यक वस्तूंवरील कर कमी करून सूक्ष्म, लघु आणि मध्यम उद्योग (MSMEs), स्थानिक विक्रेते आणि ग्राहकांना दिलासा दिला जाईल.
भारतासाठी 'रिफॉर्म टास्क फोर्स'
नवीन पिढीचे बदल घडवण्यासाठी एका विशेष 'सुधारणा कृती दला'ची (Reform Task Force) स्थापना करण्याची घोषणा पंतप्रधानांनी केली. आर्थिक विकासाला गती देणे, लाल फितीचा कारभार कमी करणे आणि प्रशासनाचे आधुनिकीकरण करणे हे या दलाचे मुख्य काम असेल.
१ लाख कोटींची 'पीएम विकसित भारत रोजगार योजना'
पंतप्रधानांनी १ लाख कोटी रुपयांच्या मोठ्या रोजगार योजनेची घोषणा केली. या अंतर्गत, नव्याने नोकरी मिळालेल्या ३ कोटी तरुणांना १५,००० रुपयांचा लाभ मिळेल.
उच्चस्तरीय लोकसंख्या मिशन
सीमावर्ती भागांमध्ये घुसखोरी आणि बेकायदेशीर स्थलांतरामुळे होणाऱ्या लोकसंख्येच्या असंतुलनाच्या धोक्यावर पंतप्रधानांनी भर दिला. या राष्ट्रीय सुरक्षा आव्हानाला तोंड देण्यासाठी, त्यांनी 'उच्चस्तरीय लोकसंख्या मिशन' (High-Powered Demography Mission) सुरू करण्याची घोषणा केली.
ऊर्जा स्वातंत्र्य: 'समुद्र मंथन' सुरू
पेट्रोल, डिझेल आणि गॅसच्या आयातीवर होणारा मोठा खर्च कमी करण्यासाठी, पंतप्रधानांनी 'राष्ट्रीय डीपवॉटर एक्सप्लोरेशन मिशन' (समुद्र मंथन) सुरू करण्याची घोषणा केली. यासोबतच सौर, हायड्रोजन, जल आणि अणुऊर्जेचा मोठा विस्तार केला जाणार आहे.
'मेड इन इंडिया' जेट इंजिन: एक राष्ट्रीय आव्हान
"ज्याप्रमाणे आपण कोरोना काळात लस बनवली आणि डिजिटल पेमेंटसाठी UPI तयार केले, त्याचप्रमाणे आपण स्वतःचे जेट इंजिनही बनवले पाहिजे," असे म्हणत पंतप्रधानांनी देशातील शास्त्रज्ञ आणि तरुणांना हे एक थेट आव्हान म्हणून स्वीकारण्याचे आवाहन केले.
