नवी दिल्ली

पंतप्रधान नरेंद्र मोदी यांनी शुक्रवारी पारंपरिक चिकित्सा पद्धतींना जागतिक आरोग्य चर्चेच्या केंद्रस्थानी आणत 'ट्रॅडिशनल मेडिसिन ग्लोबल लायब्ररी' (TMGL) या आंतरराष्ट्रीय व्यासपीठाचे लोकार्पण केले. आयुर्वेद, योग आणि इतर प्राचीन उपचार पद्धतींना संशोधन, धोरण आणि पुराव्यांवर आधारित उपचारांशी जोडण्यासाठी हे व्यासपीठ अत्यंत महत्त्वाचे ठरणार आहे.

जी-२० मधील वचनपूर्ती

'भारत मंडपम' येथे आयोजित 'दुसऱ्या डब्ल्यूएचओ (WHO) ग्लोबल समिट ऑन ट्रॅडिशनल मेडिसिन'च्या समारोपप्रसंगी पंतप्रधान बोलत होते. ही डिजिटल लायब्ररी भारताने जी-२० अध्यक्षपदाच्या काळात दिलेल्या आश्वासनाची पूर्तता असल्याचे त्यांनी सांगितले. "या प्लॅटफॉर्ममुळे पारंपरिक औषधांशी संबंधित वैज्ञानिक डेटा, संशोधन आणि धोरणात्मक दस्तऐवज प्रत्येक देशाला सहज उपलब्ध होतील," असे मोदी म्हणाले. या लायब्ररीत जगातील १९४ देशांमधील औषधोपचारांची माहिती समाविष्ट करण्यात आली आहे.

तंत्रज्ञान आणि परंपरेचा संगम

तीन दिवस चाललेल्या या शिखर परिषदेत संशोधन, एआय (AI), डिजिटल साधने आणि जागतिक मानके यावर सखोल चर्चा झाली. या चर्चेतून 'दिल्ली डिक्लेरेशन' समोर आले असून, ते सुरक्षा, प्रशिक्षण आणि मानकांवर आधारित सहकार्यासाठी मार्गदर्शक ठरेल. जामनगर येथे 'डब्ल्यूएचओ'चे जागतिक पारंपरिक औषध केंद्र असणे ही भारतासाठी अभिमानाची गोष्ट असल्याचेही पंतप्रधानांनी नमूद केले. तसेच त्यांनी दिल्लीतील 'डब्ल्यूएचओ'च्या दक्षिण-पूर्व आशिया प्रादेशिक कार्यालयाचेही उद्घाटन केले.

आधुनिक आजारांवर पारंपरिक उपाय

जीवनशैलीतील बिघाडामुळे होणारे मधुमेह, हृदयरोग, नैराश्य आणि कॅन्सर यांसारख्या आजारांवर पंतप्रधानांनी चिंता व्यक्त केली. ते म्हणाले, "आरोग्याचा समतोल पुनर्स्थापित करणे ही आता केवळ गरज नसून जागतिक निकड बनली आहे." पारंपरिक उपचार पद्धती आणि आधुनिक वैद्यकशास्त्र यांची सांगड घालून कर्करोगावर प्रभावी उपचार करण्याच्या दिशेने उचललेल्या पावलांची त्यांनी माहिती दिली.

नवीन उपक्रम आणि पुरस्कार

या कार्यक्रमात पंतप्रधानांनी 'माय आयुष इंटिग्रेटेड सर्व्हिसेस पोर्टल' आणि 'आयुष मार्क' या जागतिक गुणवत्ता मानकाचे अनावरण केले. तसेच योग प्रशिक्षणावरील तांत्रिक अहवालाचे प्रकाशन केले. योग क्षेत्रातील उल्लेखनीय कामगिरीसाठी त्यांनी 'पंतप्रधान पुरस्कारांचे' वितरण करून योग जागतिक स्तरावर नेणाऱ्या व्यक्तींचा गौरव केला. भारतीय स्टार्टअप्स या क्षेत्रात करत असलेल्या नवनवीन प्रयोगांचेही त्यांनी कौतुक केले.