पहलगाम हल्ल्याचा रशियाने 'असा' केला निषेध

Story by आवाज़ मराठी | Published by Bhakti Chalak • 3 h ago

पंतप्रधान नरेंद्र मोदी आणि रशियाचे राष्ट्राध्यक्ष व्लादिमीर पुतिन

रशियाचे राष्ट्राध्यक्ष व्लादिमीर पुतिन यांनी सोमवारी (५ मे) पंतप्रधान नरेंद्र मोदी यांना फोन करून पहलगाम दहशतवादी हल्ल्याचा तीव्र निषेध केला. २२ एप्रिलच्या या हल्ल्यात २६ जण मारले गेले आणि अनेक जण जखमी झाले. फोनवर बोलताना मोदी यांनी पुतिन यांना यावर्षी भारतात होणाऱ्या २३व्या भारत-रशिया शिखर परिषदेसाठी आमंत्रित केले. तसेच ९ मे रोजी मॉस्कोमध्ये साजऱ्या होणाऱ्या विजय दिनाच्या ८०व्या वर्धापनदिनानिमित्त शुभेच्छा दिल्या.

पुतिन हे पहलगाम हल्ल्याचा निषेध करणारे पहिले जागतिक नेते आहेत. त्यांनी भारतासोबत दहशतवादविरोधी सहकार्य वाढवण्याची इच्छा व्यक्त केली. “पुतिन यांनी पहलगाम हल्ल्याचा तीव्र निषेध केला. निर्दोषांचे मृत्यू झाल्याबद्दल त्यांनी शोक व्यक्त केला. दहशतवादाविरुद्ध लढ्यात भारताला पूर्ण पाठिंबा असल्याचे सांगितले. या भयंकर हल्ल्याचे कटकारस्थान करणारे आणि पाठीराख्यांना न्यायाच्या कठड्यावर आणले जाईल,” असे परराष्ट्र मंत्रालयाचे प्रवक्ते रणधीर जयस्वाल यांनी सांगितले.

रशियाच्या क्रेमलिनने जारी केलेल्या निवेदनात म्हटले, “या हल्ल्याला क्रूर असे संबोधत दोन्ही देशांनी दहशतवादाच्या सर्व प्रकारांविरुद्ध कठोर लढ्याची गरज व्यक्त केली. भारत-रशिया संबंध विशेष आणि मैत्रीपूर्ण भागीदारीचे आहेत. बाह्य दबावांपासून स्वतंत्र असलेले हे संबंध सर्व क्षेत्रांत गतिमानपणे विकसित होत आहेत.”

पुतिन यांनी २२ एप्रिलला मोदी यांना संदेश पाठवत म्हटले होते, “भारतीय भागीदारांसोबत दहशतवादाच्या सर्व प्रकारांविरुद्ध सहकार्य वाढवण्यासाठी आम्ही कटिबद्ध आहोत.” दोन्ही नेत्यांनी विशेष आणि मैत्रीपूर्ण रणनीतिक भागीदारी आणखी मजबूत करण्याचा निर्धार व्यक्त केला.

रशियाने मोदी यांना विजय दिनाच्या परेडसाठी आमंत्रित केले होते. मात्र भारताने संरक्षणमंत्री राजनाथ सिंह यांना प्रतिनिधी म्हणून पाठवण्याचा निर्णय घेतला. या परेडला चीनचे राष्ट्राध्यक्ष शी जिनपिंगसह अनेक देशांचे नेते उपस्थित राहणार आहेत. रशियाने सांगितले, “९ मे च्या समारंभाला भारताचा प्रतिनिधी उपस्थित असेल.”

पहलगाम हल्ल्यामुळे मोदी यांनी सौदी अरेबियाचा दौरा कमी केला. मात्र १३ ते १७ मे दरम्यान ते क्रोएशिया, नेदरलँड्स आणि नॉर्वे या तीन देशांचा दौरा करणार आहेत. शनिवारी रशियाचे परराष्ट्रमंत्री सर्जेई लाव्हरोव यांनी भारताचे परराष्ट्रमंत्री एस. जयशंकर यांच्याशी फोनवर चर्चा केली. त्यांनी नवी दिल्ली आणि इस्लामाबादमधील मतभेद १९७२च्या शिमला करार आणि १९९९च्या लाहोर घोषणेनुसार राजकीय आणि मुत्सद्दी मार्गाने सोडवावेत, असे आवाहन केले.

२७ मार्चला लाव्हरोव यांनी पुतिन यांचा यावर्षी भारत दौरा आणि भारत-रशिया शिखर परिषदेची घोषणा केली होती. भारताच्या युक्रेन संकटावरील संतुलित भूमिकेचे त्यांनी कौतुक केले. पुतिन यांनी यापूर्वी ६ डिसेंबर २०२१ ला नवी दिल्लीला एकदिवसीय भेट दिली होती. रशियाने युक्रेनविरुद्ध २४ फेब्रुवारी २०२२ ला विशेष लष्करी कारवाई सुरू केली. मोदी यांनी ८-९ जुलै २०२४ ला मॉस्कोला भेट देत २२ वी भारत-रशिया शिखर परिषद घेतली. त्यानंतर २२-२३ ऑक्टोबर २०२४ ला कझान येथे १६व्या ब्रिक्स परिषदेत ते सहभागी झाले.