पंजाबमधील अवमान प्रकरणात कडक कायद्याची मागणी करत सामाजिक कार्यकर्ते गुरजीत सिंग खालसा हे तब्बल ५६० दिवस बीएसएनएलच्या ४०० फूट उंच टॉवरवर बसून होते. अखेर शुक्रवारी सकाळी त्यांना खाली आणण्यात आले. अधिकाऱ्यांनी याबाबतची माहिती दिली.
४३ वर्षीय खालसा १२ ऑक्टोबर २०२४ रोजी पटियालाजवळील समाना येथील टॉवरवर चढले होते. गुरुग्रंथसाहिबचा अवमान करणाऱ्यांना कठोर शिक्षा देण्याची त्यांची प्रमुख मागणी होती. त्यांना खाली आणल्यानंतर या अत्यंत नाट्यमय आंदोलनाची अखेर सांगता झाली.
खालसा यांना सुरक्षितपणे खाली आणण्यासाठी पटियाला जिल्हा प्रशासनाने लष्कराची मदत घेतली. शुक्रवारी सकाळी ते खाली आले. यावेळी 'शीख जयघोष' आणि 'जो बोले सो निहाल, सत श्री अकाल'च्या घोषणांनी परिसर दुमदुमून गेला.
खाली उतरल्यानंतर खालसा यांना वैद्यकीय तपासणीसाठी रुग्णवाहिकेतून रुग्णालयात नेण्यात आले. यावेळी त्यांच्या समर्थकांनी त्यांच्यावर जोरदार पुष्पवृष्टी केली.
पटियाला जिल्ह्यातील खेरी नगैयन गावचे ते रहिवासी आहेत. या आंदोलकाला खाली आणण्यासाठी लष्कर आणि अग्निशमन दलाच्या पथकांनी गुरुवारी विशेष सराव (ड्रिल) केला होता.
पंजाब सरकारने नुकताच अवमानविरोधी कायद्याची अधिसूचना काढली. 'जागत जोत श्री गुरुग्रंथसाहिब सत्कार (दुरुस्ती) कायदा, २०२६' असे या नवीन कायद्याचे नाव आहे. या कायद्यानुसार गुरुग्रंथसाहिबचा अवमान करणाऱ्या कोणत्याही कृतीसाठी जन्मठेप आणि २५ लाख रुपयांपर्यंतच्या दंडाची कठोर तरतूद केली आहे. या निर्णयानंतरच खालसा यांनी खाली येण्याचा निर्णय घेतला.
पंजाब विधानसभेने १३ एप्रिल रोजी एका विशेष अधिवेशनात या अवमानासंदर्भातील विधेयकाला एकमताने मंजुरी दिली. त्यानंतर राज्यपाल गुलाबचंद कटारिया यांनीही या विधेयकावर मोहोर उमटवली.
गुरुग्रंथसाहिबच्या अवमानाविरुद्ध कडक कायदेशीर तरतुदी लागू करणे, हीच खालसा यांची प्रमुख मागणी होती.
हे आंदोलन अतिशय वेगळ्या स्वरूपाचे होते. खालसा यांनी टॉवरवर अत्यंत कठीण परिस्थितीचा सामना केला. कडाक्याची थंडी आणि कडक उन्हाळ्यातही ते टॉवरवरच ठाण मांडून बसले होते. त्यांच्या या जिद्दीने संपूर्ण पंजाबचे लक्ष वेधून घेतले होते.
.jpeg)
