ठाणे 

ठाणे जिल्ह्यातील भिवंडी शहरात पिझ्झा खाल्ल्याने ३४ जणांना विषबाधा झाल्याची संशयास्पद घटना समोर आली आहे. यामध्ये लहान मुलांचाही मोठ्या संख्येने समावेश असून, सर्वांना उपचारासाठी सरकारी रुग्णालयात दाखल करण्यात आले आहे. सर्व रुग्णांची प्रकृती आता धोक्याबाहेर असल्याचे डॉक्टरांनी सांगितले आहे.

ही घटना गुरुवारी उघडकीस आली. भिवंडीतील एका खाद्यपदार्थ विक्रीच्या दुकानातून बुधवारी रात्री काही नागरिकांनी पिझ्झा घेतला होता. त्यानंतर गुरुवारी दुपारपासून अनेकांना पोटदुखी, मळमळ, चक्कर येणे आणि जुलाबाचा त्रास होऊ लागला. गुरुवारी सायंकाळी ६ वाजल्यापासूनच रुग्ण सरकारी रुग्णालयात येऊ लागले होते. शुक्रवारी सकाळपर्यंत बाधितांचा ओघ सुरूच होता, अशी माहिती पोलीस अधिकाऱ्यांनी दिली.

या घटनेची गंभीर दखल घेत पोलिसांनी संबंधित खाद्यपदार्थ विक्री केंद्राच्या मालकावर भारतीय न्याय संहितेच्या (BNS) संबंधित कलमांखाली गुन्हा दाखल केला आहे. या प्रकरणाचा पुढील तपास सुरू असून, अन्न नमुने प्रयोगशाळेत विश्लेषणासाठी पाठवण्यात आले आहेत.