दुबई 

भारतीय संघाचा यष्टिरक्षक-फलंदाज इशान किशन याने आयसीसीच्या ताज्या पुरुष टी-२० आंतरराष्ट्रीय फलंदाजी क्रमवारीत अव्वल स्थान पटकावले आहे. इशानने आपल्याच संघातील अभिषेक शर्माला मागे टाकत पहिल्या क्रमांकावर झेप घेतली आहे. इशान किशनचे ८७६ रँकिंग पॉइंट्स असून, अभिषेक शर्मा ८६९ गुणांसह दुसऱ्या क्रमांकावर घसरला आहे.

इशान किशनचा शानदार फॉर्म

वर्षाच्या सुरुवातीला झालेल्या टी-२० वर्ल्ड कपमधील सातत्यपूर्ण कामगिरीमुळे इशान किशनच्या क्रमवारीत मोठी सुधारणा झाली आहे. त्याने वर्ल्ड कपमध्ये जवळपास २०० च्या स्ट्राईक रेटने ३१७ धावा केल्या होत्या, ज्यात कोलंबो येथे पाकिस्तानविरुद्धच्या सामन्यातील 'प्लेअर ऑफ द मॅच' खेळीचाही समावेश आहे. इशान किशन आता विराट कोहली आणि सूर्यकुमार यादव यांसारख्या दिग्गज भारतीय खेळाडूंच्या खास गटात सामील झाला आहे, ज्यांनी टी-२० क्रिकेटमध्ये अव्वल स्थान भूषवले आहे. पाकिस्तानचा साहिबजादा फरहान ८४८ गुणांसह तिसऱ्या क्रमांकावर आहे.

इतर भारतीय खेळाडूंची स्थिती

ताज्या क्रमवारीत भारताचा उपकर्णधार तिलक वर्मा ७४७ गुणांसह सहाव्या स्थानावर स्थिर आहे, तर माजी कर्णधार सूर्यकुमार यादव एका स्थानाने घसरून आठव्या क्रमांकावर पोहोचला आहे. गोलंदाजी क्रमवारीत भारताचा फिरकीपटू वरुण चक्रवर्ती आणि वेगवान गोलंदाज जसप्रीत बुमराह हे दोघेही प्रत्येकी एका स्थानाने घसरून अनुक्रमे तिसऱ्या आणि सहाव्या क्रमांकावर आले आहेत. अफगाणिस्तानचा रशीद खान गोलंदाजी क्रमवारीत अव्वल स्थानी कायम आहे.

कसोटी फलंदाजी क्रमवारीत ऑस्ट्रेलियाचा ट्रॅव्हिस हेड अव्वल स्थानी पोहोचला असून, जो रूट तिसऱ्या क्रमांकावर घसरला आहे. भारतीय कसोटी संघाचा कर्णधार शुभमन गिल सहाव्या क्रमांकावर आहे, तर यशस्वी जैस्वाल नवव्या क्रमांकावर आहे. जसप्रीत बुमराह हा कसोटी गोलंदाजी क्रमवारीत जगातील अव्वल क्रमांकाचा गोलंदाज आहे.