भारतीय बॅडमिंटनपटू पी. व्ही. सिंधू
दोन वेळा ऑलिम्पिक पदक विजेती भारतीय बॅडमिंटनपटू पी. व्ही. सिंधूने जपान ओपन स्पर्धेत उपांत्य फेरीत धडक मारली आहे. उपांत्यपूर्व फेरीत प्रतिस्पर्धी खेळाडू नोझोमी ओकुहारा हिने माघार घेतल्यामुळे सिंधूला थेट उपांत्य फेरीत प्रवेश मिळाला. तब्बल तीन वर्षांनंतर सिंधूने एखाद्या 'सुपर ७५०' स्पर्धेच्या उपांत्य फेरीत स्थान मिळवले आहे.
ऐतिहासिक कामगिरी
२०१९ ची विश्वविजेती असलेल्या सिंधूने याआधी २०२३ मध्ये डेन्मार्क ओपनमध्ये 'सुपर ७५०' स्पर्धेची उपांत्य फेरी गाठली होती. यंदाच्या हंगामातील ही तिची तिसरी उपांत्य फेरी आहे. यापूर्वी तिने मलेशिया ओपन (सुपर १०००) आणि ऑस्ट्रेलियन ओपन (सुपर ५००) स्पर्धेतही चमकदार कामगिरी केली होती. विशेष म्हणजे, ज्या नोझोमी ओकुहाराने माघार घेतली, तिलाही उप-उपांत्यपूर्व फेरीत दक्षिण कोरियाच्या आन सी-योंगच्या दुखापतीमुळे वॉकओव्हर मिळाला होता.
आता चेन युफेईसोबत सामना
उपांत्य फेरीत आता सिंधूचा सामना ऑलिम्पिक चॅम्पियन चीनच्या चेन युफेईशी होणार आहे. चेन युफेईने उपांत्यपूर्व फेरीत दक्षिण कोरियाच्या सिम यू जिनचा २१-१०, २१-१२ अशा फरकाने पराभव करत शेवटच्या चारमध्ये स्थान पक्के केले.
चीनच्या या चौथ्या मानांकित खेळाडूचा सिंधूविरुद्ध ८-६ असा हेड-टू-हेड रेकॉर्ड आहे. सिंधूने तिला शेवटच्या वेळी २०१९ च्या विश्व अजिंक्यपद स्पर्धेच्या उपांत्य फेरीत पराभूत केले होते, जिथे सिंधूने ऐतिहासिक सुवर्णपदक पटकावले होते.
.jpeg)
.jpg "११ वर्षीय भारतीय रेसिंग स्टार अतिका मीर")