हार्मुझ सामुद्रधुनीवर नियंत्रणावरून अमेरिका-इराण आमनेसामने; ट्रम्प यांच्याकडून युद्धाची भाषा

Story by आवाज़ मराठी | Published by Bhakti Chalak • 12 h ago

अमेरिकेचे राष्ट्राध्यक्ष डोनाल्ड ट्रम्प

इराणचे दिवंगत सर्वोच्च नेते अयातुल्ला अली खामेनी यांच्या अंत्यसंस्कारादरम्यान डोनाल्ड ट्रम्प यांना जीवे मारण्याच्या घोषणा करण्यात आल्यानंतर, अमेरिकेचे राष्ट्राध्यक्ष डोनाल्ड ट्रम्प यांनी इराणला कडक शब्दांत इशारा दिला आहे. हार्मुझ सामुद्रधुनी मोकळी ठेवावी आणि जहाजांवरील हल्ले थांबवावेत, अशी मागणी अमेरिकेकडून करण्यात आली आहे. मात्र, या मार्गावर आपलाच ताबा असल्याचे सांगत इराणने याकडे दुर्लक्ष केले आहे.

ट्रम्प यांचा लष्करी इशारा

सोशल मीडिया प्लॅटफॉर्मवर ट्रम्प यांनी इराणला थेट धमकी दिली आहे. "इस्लामिक रिपब्लिक ऑफ इराणवर १,००० क्षेपणास्त्रे तैनात आहेत. इराणने जर त्यांच्या धमक्यांवर कृती केली, तर आम्ही इराणचा पूर्णपणे विनाश करू," असे ट्रम्प यांनी आपल्या पोस्टमध्ये म्हटले आहे. इराणमध्ये खामेनींच्या अंत्यसंस्कारावेळी त्यांना आणि इस्रायलचे पंतप्रधान बेंजामिन नेतन्याहू यांना जीवे मारण्याचे बॅनर झळकवण्यात आले होते, त्याचा उल्लेख ट्रम्प यांनी आपल्या धमकीत केला आहे.

हार्मुझ सामुद्रधुनीवरून तणाव

हार्मुझ सामुद्रधुनी हा जागतिक तेल आणि वायू व्यापाराचा मुख्य मार्ग आहे. या मार्गावर आपला पूर्ण ताबा असावा आणि येथून जाणाऱ्या जहाजांकडून शुल्क वसूल करावे, अशी इराणची मागणी आहे. मात्र, हा आंतरराष्ट्रीय जलमार्ग असल्याचे जगाने मान्य केले आहे. अमेरिकेने या मार्गावरील इराणचा दबाव कमी करण्यासाठी आपल्या नौदलाला ओमानच्या सागरी हद्दीतून जाण्याच्या सूचना दिल्या आहेत, ज्यावर इराणने संताप व्यक्त केला आहे.

या संघर्षाच्या पार्श्वभूमीवर अमेरिका आणि इराणमधील तात्पुरता संघर्षविराम मोडकळीस आला असून, इराणने जॉर्डन, कुवेत, कतार आणि बहरीनवर हल्ले केले आहेत. इराणच्या अण्वस्त्र कार्यक्रमाबाबत बोलताना अमेरिकन अधिकाऱ्यांनी स्पष्ट केले की, इराणने त्यांच्याकडील संवर्धित युरेनियमचा साठा सोपवल्याशिवाय कोणताही अणू करार केला जाणार नाही. या तणावामुळे मध्यपूर्वेतील परिस्थिती पुन्हा एकदा स्फोटक झाली आहे.