इस्राईल : नेतन्याहू यांच्या 'या' घोषणेने जगभरात खळबळ

Story by आवाज़ मराठी | Published by Fazal Pathan • 1 d ago

इस्राईलचे पंतप्रधान बेंजामिन नेतन्याहू

इस्राईलचे पंतप्रधान बेंजामिन नेतन्याहू यांनी गाझावर पूर्ण कब्जा करण्याची घोषणा करत मध्यपूर्वेत खळबळ उडवून दिली आहे. त्यांनी आपल्या सोशल मीडियावर एक व्हिडीओ प्रसिद्ध केला. यामध्ये त्यांनी स्पष्टपणे सांगितले की, “इस्राईली लष्कर (IDF) गाझावर पूर्णपणे ताबा मिळवेल. आम्ही गाझावर संपूर्ण कब्जा करणार आहोत.”

नेतन्याहू यांनी त्यांची विस्तारवादी नीती उघडपणे कबूल केली आहे. त्यांनी व्हिडीओमध्ये नमूद केले की, गाझामध्ये मानवीय मदत पोहोचवण्यासाठी मार्ग खुले करण्याचा आंतरराष्ट्रीय दबाव वाढत आहे. गाझातील भूक संकट टाळण्यासाठी अत्यल्प प्रमाणात अन्नपुरवठा आणि मानवीय मदत गाझामध्ये जाऊ देण्याची तयारी दर्शवली आहे.

जानेवारीमध्ये इस्राईल आणि हमास यांच्यात युद्धबंदीचा करार झाला होता. मात्र, मार्चमध्ये अवघ्या दोन महिन्यांतच इस्राईलने हा करार मोडला आणि गाझावर पुन्हा हल्ले सुरू केले. यासोबतच, गाझामध्ये जाणारी सर्व मानवीय मदत रोखण्यात आली. नेतन्याहू यांनी आता गाझावर कब्जा करण्याच्या योजनेची स्पष्ट घोषणा केली आहे.

इस्राईलच्या नाकेबंदीमुळे गाझामध्ये भीषण मानवीय संकट निर्माण झाले आहे. संयुक्त राष्ट्रसंघाच्या UNRWA या संस्थेच्या अहवालानुसार, गाझातील प्रत्येक नागरिक नाकेबंदीमुळे दोन ते तीन दिवसांत केवळ एकदाच जेवण घेऊ शकतो. सध्या गाझातील २.३ दशलक्ष लोकसंख्येला भूकबळीचा सामना करावा लागत आहे. याशिवाय, औषधे, स्वच्छ पाणी आणि इंधन यांसारख्या मूलभूत गरजाही पूर्ण होत नाहीत. यामुळे रोगराई आणि मृत्यूंचा धोका वाढला आहे.

नेतन्याहू यांनी आपल्या व्हिडीओत म्हटले की, गाझातील भूक संकट टाळण्यासाठी ते मानवीय मदत पाठवण्यास परवानगी देतील. मात्र, संयुक्त राष्ट्रसंघ आणि इतर मानवतावादी संस्थांनी या योजनेवर टीका केली आहे. त्यांचे म्हणणे आहे की, इस्राईलचे हे धोरण मानवतावादी तत्त्वांचे उल्लंघन करते आणि ही मदत गाझातील सर्व गरजूंना पुरेशी नाही.

इस्राईलच्या या नाकेबंदी आणि आक्रमक धोरणावर संयुक्त राष्ट्रसंघ, युरोपियन युनियन आणि इतर देशांनी तीव्र नाराजी व्यक्त केली आहे. UNRWA चे प्रमुख फिलिप लॅझारिनी यांनी सांगितले की, गाझामधील परिस्थिती भयावह आहे आणि नाकेबंदीमुळे तिथे भूकबळी पसरत आहे. याशिवाय, आंतरराष्ट्रीय फौजदारी न्यायालयाने (ICC) नेतन्याहू आणि इस्राईली नेत्यांवर युद्ध गुन्ह्यांचे आरोप ठेवले आहेत.

गाझामधील १८ महिन्यांच्या हल्ल्यांमुळे ५२,००० हून अधिक लोकांचा मृत्यू झाला आहे. यामध्ये हजारो मुले आणि महिलांचा समावेश आहे. जवळपास १,२०,००० लोक जखमी झाले आहेत आणि ९२% घरे उद्ध्वस्त झाली आहेत. यामुळे गाझाची अवस्था अत्यंत दयनीय झाली आहे.

नेतन्याहू यांच्या या घोषणेमुळे मध्यपूर्वेतील तणाव आणखी वाढण्याची शक्यता आहे. त्यांचे धोरण हमासला पूर्णपणे नष्ट करण्याचे आहे. परंतु यामुळे गाझातील सामान्य नागरिकांचे हाल होत आहेत. इस्राईलच्या काही मंत्र्यांनी गाझातील पॅलेस्टाईन लोकांना बाहेर काढून तिथे ज्यू वसाहती स्थापन करण्याची योजना आखली आहे. या योजनेचा आंतरराष्ट्रीय समुदायाने तीव्र निषेध व्यक्त केला आहे.

नेतन्याहू यांचा गाझावर कब्जा करण्याचा हट्ट आणि मानवीय मदत रोखण्याचे धोरण यामुळे गाझातील परिस्थिती आणखी बिकट होत आहे. आंतरराष्ट्रीय समुदायाने या संकटाकडे तातडीने लक्ष देण्याची आणि पॅलेस्टाईन नागरिकांना वाचवण्यासाठी ठोस पावले उचलण्याची गरज आहे. नेतन्याहू यांच्या या धमकीमुळे केवळ गाझाच नव्हे, तर संपूर्ण मध्यपूर्वेत अस्थिरता वाढण्याचा धोका आहे.

'आवाज मराठी'वर प्रसिद्ध होणारे लेखन, व्हिडिओज आणि उपक्रम यांविषयीचे अपडेट्स मिळवण्यासाठी या लिंक्सवर क्लिक करा -

Awaz Marathi WhatsApp Group
Awaz Marathi Facebook Page

Awaz Marathi Twitter