अमेरिकेचे उपराष्ट्राध्यक्ष जे. डी. वान्स
अमेरिकेचे उपराष्ट्राध्यक्ष जे. डी. वान्स यांनी स्पष्ट केले आहे की, वॉशिंग्टन आणि तेहरानमधील शस्त्रसंधी लेबनॉनपर्यंत लागू नाही. वाटाघाटी दरम्यान या कराराच्या व्याप्तीबाबत झालेला गोंधळ हा कायदेशीर गैरसमज असल्याचे त्यांनी म्हटले आहे. पाकिस्तानी मध्यस्थ आणि इराणी अधिकाऱ्यांनी हा करार प्रादेशिक स्तरावर व्यापक असेल असे संकेत दिले होते. त्यांच्या या दाव्यांच्या पार्श्वभूमीवर वान्स यांनी हे विधान केले आहे.
बुडापेस्टमध्ये पत्रकारांशी बोलताना वान्स म्हणाले, "मला वाटते हा एक कायदेशीर गैरसमज आहे. इराणला वाटले की या शस्त्रसंधीमध्ये लेबनॉनचा समावेश आहे, पण प्रत्यक्षात तसे अजिबात नाही."
हा करार केवळ इराण, अमेरिका आणि इस्रायलसह आखाती देशांसारख्या मित्रराष्ट्रांपुरता मर्यादित असल्याचे वान्स यांनी पुन्हा एकदा ठामपणे सांगितले. त्याचबरोबर हा करार धोक्यात न आणण्याबाबत त्यांनी तेहरानला इशाराही दिला आहे. वाटाघाटींना बळ देण्यासाठी इस्रायलने लेबनॉनमध्ये काही प्रमाणात संयम दाखवण्याचा प्रस्ताव दिला होता, मात्र शस्त्रसंधीमध्ये अशा कोणत्याही औपचारिक वचनबद्धतेचा समावेश नव्हता, असेही त्यांनी नमूद केले.
वान्स पुढे म्हणाले, "इराणचा ज्या संघर्षात पराभव होत होता, तो संघर्ष लेबनॉनच्या मुद्द्यावरून त्यांना पुन्हा सुरू करायचा असेल, तर तो त्यांचा निर्णय असेल. लेबनॉनचा इराणशी काहीही संबंध नाही आणि अमेरिकेने एकदाही लेबनॉन या शस्त्रसंधीचा भाग असल्याचे म्हटलेले नाही. हा करार मोडीत काढणे ही इराणची मोठी चूक ठरेल, पण शेवटी हा सर्वस्वी त्यांचा निर्णय आहे."
.jpeg)
