'जैश-ए-मोहम्मद' या दहशतवादी संघटनेचा प्रमुख मसूद अझहरचा भाऊ मोहम्मद ताहीर अन्वर याचा पाकिस्तानात मृत्यू झाला आहे. त्याच्या मृत्यूचे नेमके कारण अद्याप स्पष्ट झालेले नाही. ताहीर अन्वर अनेक वर्षांपासून जैश-ए-मोहम्मदशी जवळून जोडलेला होता आणि संघटनेच्या कारवायांमध्ये तो सक्रिय होता.
या दहशतवादी संघटनेच्या अधिकृत चॅनेलद्वारे त्याच्या मृत्यूच्या बातमीला दुजोरा देण्यात आला आहे. बहावलपूरमधील जामिया मशीद उस्मान वाली येथे सोमवारी रात्री उशिरा त्याच्यावर अंत्यसंस्कार केले जाणार असल्याचे संघटनेने म्हटले आहे. ताहीर अन्वरचा मृत्यू एखाद्या आजारामुळे झाला की घातपातामुळे, याबाबत अद्याप कोणतीही अधिकृत माहिती समोर आलेली नाही. कोणत्याही विशिष्ट घटनेचा किंवा आजाराचा उल्लेख नसल्यामुळे त्याच्या मृत्यूबाबत प्रश्नचिन्ह निर्माण झाले आहे.
जैश-ए-मोहम्मद ही भारतातील अनेक मोठ्या दहशतवादी हल्ल्यांमध्ये सामील असलेली संघटना आहे. २००१ मधील संसदेवरील हल्ला, २०१६ मधील पठाणकोट हवाई तळावरील हल्ला, १९ सैनिकांचा बळी घेणारा उरी हल्ला आणि ४० सीआरपीएफ जवानांचे बलिदान गेलेला २०१९ मधील पुलवामा हल्ला, अशा अनेक घटनांमध्ये या संघटनेचा हात असल्याचे स्पष्ट झाले आहे.
भारतीय सुरक्षा दलांनी पाकिस्तानमधील जैशच्या तळांवर अनेकदा हल्ले केले आहेत. यामध्ये बहावलपूरमधील त्यांच्या मुख्यालयाचाही समावेश होता. या हल्ल्यांमध्ये मसूद अझहरचे अनेक जवळचे नातेवाईक मारले गेले आहेत. गेल्या वर्षी सप्टेंबरमध्ये जैशने पहिल्यांदाच या नुकसानीची अप्रत्यक्षपणे कबुली दिली होती.
२२ एप्रिल रोजी पहलगाममध्ये झालेल्या दहशतवादी हल्ल्यात २६ जणांचा मृत्यू झाला होता. या हल्ल्याला प्रत्युत्तर म्हणून भारताने 'ऑपरेशन सिंदूर' अंतर्गत बहावलपूरवर हवाई हल्ला केला होता. या हल्ल्यात अझहरच्या कुटुंबातील सदस्य मारले गेल्याची कबुली संघटनेच्या एका वरिष्ठ कमांडरने दिली होती.
भारतीय हवाई हल्ल्यात दहशतवाद्यांचे अनेक तळ उद्ध्वस्त झाले होते. बहावलपूरमधील जामिया मशीद सुभान अल्लाह या इमारतीचेही मोठे नुकसान झाले होते. मसूद अझहरची बहीण, तिचा पती, पुतण्या, भाची आणि विस्तारित कुटुंबातील मुलांसह त्याचे जवळपास १० नातेवाईक या हल्ल्यात ठार झाले होते. याशिवाय अझहरचे अनेक साथीदारही या कारवाईत मारले गेले होते.
.jpg "अनीसा सय्यद")
.jpg "अलिमा रहमान")
.jpeg)
