पूर्व इंग्लंडमधील एका स्थानिक परिषदेचे प्रतिनिधित्व करणाऱ्या २३ वर्षीय तरुण भारतीय वंशाच्या राजकारण्याने युनायटेड किंगडम (UK) मध्ये एक नवा इतिहास रचला आहे. मूळ भारतीय वंशाचे तुषार कुमार हे ब्रिटनच्या इतिहासातील सर्वात तरुण महापौर बनले आहेत.

२३ व्या वर्षी हाती घेतली शहराची धुरा

लंडनमधील प्रतिष्ठित किंग्ज कॉलेजमधून राज्यशास्त्र (Political Science) चे शिक्षण घेणाऱ्या तुषार कुमार यांनी गेल्या आठवड्यात एका भव्य समारंभात 'एल्सट्री आणि बोरेहमवूड' (Elstree and Borehamwood) शहराचे महापौर म्हणून अधिकृतपणे सूत्रे हाती घेतली. लेबर पार्टीचे कौन्सिलर असलेले तुषार २०२३ मध्ये एल्सट्री आणि बोरेहमवूड टाऊन कौन्सिलमध्ये सामील झाले होते. यापूर्वी त्यांनी उपमहापौर म्हणूनही जबाबदारी सांभाळली आहे. महापौरपदाची शपथ घेतल्यानंतर तुषार कुमार म्हणाले की, "वयाच्या अवघ्या २३ व्या वर्षी युनायटेड किंगडमच्या इतिहासातील सर्वात तरुण भारतीय वंशाचा महापौर बनणे हा माझ्यासाठी एक अविश्वसनीय सन्मान आहे. नागरिकांनी, स्थानिक संस्थांनी आणि माझ्या सहकाऱ्यांनी माझ्यावर दाखवलेल्या विश्वासाबद्दल मी अत्यंत कृतज्ञ आहे."

लोकसेवेचा आणि सामाजिक कार्याचा अनुभव

तुषार कुमार हे लंडनमध्ये शिक्षण घेत असतानाच अत्यंत तरुण वयात कौन्सिलर म्हणून निवडून आले होते. वास्तविक बदल हा स्थानिक पातळीवरूनच सुरू होतो, असा त्यांचा ठाम विश्वास आहे. त्यांनी किंग्ज कॉलेज लंडनच्या 'सिव्हिक लीडरशिप अकॅडमी'चे आभार मानले, ज्यामुळे त्यांचा आत्मविश्वास आणि वक्तृत्व कौशल्य सुधारण्यास मदत झाली. तुषार यांनी यापूर्वी ब्रिटनच्या कामगार आणि पेन्शन विभागात (DWP) धोरण सल्लागार (Policy Advisor) म्हणून आणि एका राष्ट्रीय एलजीबीटीक्यू+ (LGBTQ+) संस्थेसाठी संशोधन विश्लेषक म्हणून काम केले आहे. युवा सक्षमीकरण, शिक्षण आणि साक्षरता मोहिमांमध्ये त्यांनी सक्रिय सहभाग घेतला आहे.

गरजूंच्या मदतीसाठी पुढाकार

आपल्या महापौरपदाच्या कार्यकाळात तुषार कुमार यांनी 'WD6 फूड सपोर्ट' या स्वयंसेवी संस्थेला मुख्य धर्मादाय संस्था (Focus Charity) म्हणून निवडले आहे, जी परिसरातील गरीब आणि गरजू नागरिकांना अन्नधान्य पुरवण्याचे काम करते. ब्रिटनमध्ये स्थानिक कौन्सिलच्या महापौरांचे पद हे अत्यंत मानाचे आणि परंपरेने नटलेले असते. आपल्या कार्यकाळात तरुण पिढीला सार्वजनिक सेवेत येण्यासाठी प्रेरित करणे आणि स्थानिक संस्थांना बळकट करणे हे आपले मुख्य उद्दिष्ट असल्याचे तुषार कुमार यांनी स्पष्ट केले आहे.