बांगलादेश नॅशनल पार्टीचे (बीएनपी) कार्यवाहू अध्यक्ष तारिक रहमान आज बांगलादेशचे नवे पंतप्रधान म्हणून शपथ घेतील. नुकत्याच झालेल्या सार्वत्रिक निवडणुकीत त्यांच्या पक्षाने मिळवलेल्या दणदणीत विजयानंतर हा शपथविधी सोहळा पार पडत आहे. ढाका येथील बंगाभवन या राष्ट्राध्यक्षांच्या अधिकृत निवासस्थानी हा ऐतिहासिक सोहळा आयोजित केला असून राष्ट्राध्यक्ष मोहम्मद शहाबुद्दीन त्यांना पद आणि गोपनीयतेची शपथ देतील. स्थानिक वेळेनुसार दुपारी ३:०० वाजता हा कार्यक्रम सुरू होईल. या सोहळ्याला विविध देशांचे राजदूत, राजकीय नेते आणि नामांकित व्यक्ती उपस्थित राहणार आहेत.
निवडणुकीत 'बीएनपी'ने ३०० जागांपैकी तब्बल २३५ जागा जिंकून निर्विवाद बहुमत मिळवले आहे. भ्रष्टाचार आणि मानवी हक्कांच्या उल्लंघनाचे आरोप असलेल्या मागील सरकारला जनतेने सत्तेतून बेदखल केले. तारिक रहमान हे गेल्या अनेक वर्षांपासून लंडनमध्ये राजकीय वनवासात होते. निवडणुकीच्या निकालांनंतर ते मायदेशी परतले असून त्यांच्या आगमनामुळे समर्थकांमध्ये प्रचंड उत्साह दिसत आहे. 'बीएनपी'च्या प्रवक्त्यांनी दिलेल्या माहितीनुसार, शपथविधीनंतर तारिक रहमान देशाला उद्देशून भाषण करतील. या भाषणात ते देशापुढील आर्थिक आव्हाने आणि लोकशाही पुनर्स्थापनेचा आपला रोडमॅप मांडण्याची शक्यता आहे.
सुरक्षेच्या कारणास्तव ढाका शहरात कडक पोलीस बंदोबस्त तैनात केला आहे. 'बंगाभवन' कडे जाणारे सर्व रस्ते नागरिकांसाठी बंद केले असून केवळ निमंत्रितांनाच प्रवेश दिला जात आहे. भारतासह अनेक शेजारील राष्ट्रांनी तारिक रहमान यांचे विजयाबद्दल अभिनंदन केले असून दक्षिण आशियातील स्थिरता आणि विकासासाठी नवीन सरकारसोबत काम करण्याची इच्छा व्यक्त केली आहे.
.webp "डॉ.मुहम्मद अब्दुल हकीम अझारी")
.jpeg)
