आवाज द व्हॉईस, नवी दिल्ली 

नवी दिल्लीस्थित जामिया हमदर्द विद्यापीठात कालपासून (७ एप्रिल) एका अनोख्या सांस्कृतिक उत्सवाला सुरुवात झाली आहे. हा उत्सव १० एप्रिलपर्यंत चालणार आहे. 'कल्चरल कॅनव्हास' या नावाने आयोजित केलेला हा कार्यक्रम विद्यार्थ्यांच्या सर्जनशीलता, अभिव्यक्ती आणि सांस्कृतिक विविधतेचा एक जिवंत उत्सव आहे. सलग चार दिवस चालणारा हा महोत्सव विद्यापीठाच्या परिसराला रंग, संगीत, विचार आणि ऊर्जेने पूर्णपणे भिजवून टाकेल.

या आयोजनाला अधिक व्यापक स्वरूप देण्यासाठी 'आवाज द व्हॉईस' हा डिजिटल मीडिया प्लॅटफॉर्म 'मीडिया पार्टनर' म्हणून जोडला गेला आहे. 'आवाज द व्हॉईस' या कार्यक्रमातील घडामोडींचे कव्हरेज करण्यासोबतच हा महोत्सव डिजिटल जगात एका विस्तृत प्रेक्षकवर्गापर्यंत पोहोचवण्याचे काम करेल. यातून सहभागी विद्यार्थ्यांना राष्ट्रीय पातळीवर आपली वेगळी ओळख निर्माण करण्याची उत्तम संधी मिळेल.

या महोत्सवात दररोज सकाळी ९:३० वाजता कार्यक्रमांची सुरुवात होते. 'इस्लामिक क्विझ' आणि 'डान्स योगा' यांसारख्या उपक्रमांनी दिवसाची सुरुवात ज्ञान आणि फिटनेसच्या सुरेख संगमाने होते. मल्टीपर्पज हॉल आणि अर्काइव्हज ऑडिटोरियमसारख्या प्रमुख ठिकाणी विद्यार्थ्यांचा सहभाग संपूर्ण वातावरणात एक नवी जान फुंकत आहे. ऊर्जा, उत्साह आणि निकोप स्पर्धा एकाच छताखाली पाहायला मिळत आहे.

दुपारच्या वेळेत हा उत्सव आपल्या सर्जनशीलतेच्या शिखरावर पोहोचतो. 'सेल्फ-कम्पोज्ड पोएट्री', नात स्पर्धा आणि 'कार्टून स्केचिंग' यांसारखे कार्यक्रम तिथे पार पडत आहेत. यातून स्पर्धकांना त्यांची कल्पकता आणि कलात्मक विचार व्यक्त करण्याची हक्काची जागा मिळत आहे. 'पॉइंट काउंट पॉइंट'सारख्या संवादात्मक सत्रांमध्ये प्रेक्षकही हिरीरीने सहभागी होत आहेत. त्यामुळे सर्वांसाठी हा एक जिवंत आणि संस्मरणीय अनुभव बनत आहे.

दुपारी २ वाजेनंतर कार्यक्रमाचे स्वरूप आणखी व्यापक होते. कथालेखन, वक्तृत्व (एक्सटेम्पोर), बैतबाजी आणि कॅलिग्राफीसारख्या स्पर्धा तिथे रंगत आहेत. या स्पर्धांमधून भाषा, विचार आणि अभिव्यक्तीची खोली सर्वांसमोर येत आहे. दुसरीकडे, संगीतप्रेमींसाठी सोलो, ड्युएट, ग्रुप साँग आणि गझल गायनाचे कार्यक्रम आयोजित केले आहेत. अर्काइव्हज ऑडिटोरियममध्ये या सुरांचा सुरेख मेळ अनुभवायला मिळत आहे.

या महोत्सवाचे सर्वात महत्त्वाचे वैशिष्ट्य म्हणजे त्यातील विविधता. स्किट, 'स्टँड-अप ॲक्ट', कोलाज, 'डंब कॅराड्स', रांगोळी आणि कव्वाली स्पर्धा या महोत्सवात अधिक रंगत आणत आहेत. प्रत्येक सादरीकरणातील स्पर्धकांची जिद्द आणि प्रेक्षकांच्या टाळ्या या आयोजनात खऱ्या अर्थाने रंग भरत आहेत.

'कल्चरल कॅनव्हास'च्या माध्यमातून प्रत्येक विद्यार्थ्याला स्वतःमधील दडलेल्या कलागुणांना समोर आणण्याची एक उत्तम संधी मिळाली आहे. हा महोत्सव विद्यार्थ्यांचा आत्मविश्वास वाढवण्यासोबतच त्यांना सामाजिक आणि सांस्कृतिकदृष्ट्या अधिक प्रगल्भ बनवण्याचे काम करत आहे.

चार दिवस चालणारा हा महोत्सव जामिया हमदर्दच्या सांस्कृतिक इतिहासात नक्कीच एक नवे पर्व सुरू करेल. तिथे कला, संस्कृती आणि तरुणाईचा सळसळता उत्साह एकत्र येऊन एक नवी यशोगाथा रचत आहेत. ही गोष्ट नक्कीच दीर्घकाळ सर्वांच्या स्मरणात राहील.