नवी दिल्ली 

राजधानी दिल्लीत इन्फ्लूएंझा आणि H1N1 (स्वाइन फ्लू) च्या रुग्णांमध्ये झपाट्याने वाढ होत असून, या पार्श्वभूमीवर मुख्यमंत्री रेखा गुप्ता यांनी एक तातडीची उच्चस्तरीय आपत्कालीन बैठक बोलावली आहे. दिल्लीचे आरोग्य मंत्री पंकज कुमार सिंह यांनी मंगळवारी एका पत्रकार परिषदेत ही माहिती दिली. शहरात यावर्षी इन्फ्लूएंझाचे सुमारे ३,००० रुग्ण आढळले असून, त्यापैकी २,३०८ प्रकरणे केवळ H1N1 संसर्गाची आहेत.

आरोग्य विभागाच्या वरिष्ठ अधिकाऱ्यांसोबत झालेल्या आढावा बैठकीनंतर बोलताना आरोग्य मंत्री म्हणाले की, परिस्थिती पूर्णपणे नियंत्रणात असून रुग्णालयांमध्ये डॉक्टर, वैद्यकीय कर्मचारी आणि औषधांची कोणतीही कमतरता नाही. "घाबरण्याचे कोणतेही कारण नाही. रुग्ण उपचारासाठी येत आहेत आणि बरे होऊन घरी परतत आहेत. प्रत्येक रुग्णालयात विलगीकरण कक्ष (Isolation wards) तयार करण्यात आले आहेत," असे त्यांनी स्पष्ट केले. कोणत्याही रुग्णाला खाट (Bed) उपलब्ध न झाल्यास संबंधित रुग्णालयावर कठोर कारवाई केली जाईल, असा इशाराही त्यांनी दिला आहे.

H1N1 ची लक्षणे आणि काळजी

H1N1 संसर्ग, ज्याला सामान्यतः स्वाइन फ्लू म्हणून ओळखले जाते, यामध्ये ताप, खोकला, घसा खवखवणे, डोकेदुखी, अंगदुखी आणि थकवा ही लक्षणे प्रामुख्याने आढळतात. ज्या रुग्णांना सतत उच्च ताप, श्वास घेण्यास त्रास, छातीत दुखणे किंवा प्रकृती खालावल्यासारखी लक्षणे जाणवत असतील, त्यांनी त्वरित वैद्यकीय सल्ला घ्यावा, असा सल्ला आरोग्य विभागाने दिला आहे. MCD, NDMC आणि दिल्ली कॅन्टोन्मेंट बोर्डाच्या अधिकाऱ्यांसोबत घेतलेल्या या बैठकीत वेक्टर-जन्य आजारांच्या नियंत्रणावरही चर्चा करण्यात आली.