सँटियागो
दक्षिण अमेरिकेतील चिली या देशाने कुत्र्यांमुळे मानवात पसरणाऱ्या रेबीज (Rabies) आजाराचे पूर्णपणे उच्चाटन केले आहे. अशी ऐतिहासिक कामगिरी करणारा चिली हा दक्षिण अमेरिकेतील पहिला देश ठरला असून जागतिक आरोग्य संघटनेने (WHO) या यशाला अधिकृत मान्यता दिली आहे.
जागतिक आरोग्य संघटनेनुसार, चिलीमध्ये कुत्र्यामुळे मानवाला रेबीज होण्याचा शेवटचा रुग्ण १९७२ मध्ये आढळून आला होता. गेल्या पाच दशकांपासून सातत्याने राबवलेल्या सार्वजनिक आरोग्य, लसीकरण आणि देखरेख मोहिमांमुळे हा मैलाचा दगड गाठता आला आहे. डब्लूएचओचे महासंचालक टेड्रोस अधानोम गेब्रेयेसस यांनी या यशाबद्दल चिलीचे कौतुक करताना सांगितले की, "हा विजय सार्वजनिक आरोग्यातील दीर्घकालीन गुंतवणुकीचे प्रतीक असून इतर देशांसाठी प्रेरणादायी आहे."
चिलीच्या आरोग्य मंत्री मे चोमाली यांनी देशातील सर्व नागरिक, स्थानिक नगरपालिका आणि आरोग्य कर्मचाऱ्यांचे आभार मानले. घरोघरी जाऊन पाळीव आणि भटक्या प्राण्यांचे लसीकरण करणे, नागरिकांमध्ये जनजागृती करणे आणि संभाव्य संसर्ग झालेल्या व्यक्तींवर वेळेवर उपचार करणे यामुळे हे यश शक्य झाल्याचे त्यांनी सांगितले.
रेबीज हा विषाणूजन्य आजार प्रामुख्याने बाधित प्राण्याच्या लाळेतून किंवा चावल्यामुळे पसरतो. लक्षणे दिसू लागल्यानंतर हा आजार अत्यंत जीवघेणा ठरतो, परंतु वेळेवर लसीकरण आणि प्रतिबंधात्मक उपायांमुळे तो पूर्णपणे रोखता येतो. पॅन अमेरिकन हेल्थ ऑर्गनायझेशननेही चिलीच्या या सार्वजनिक आरोग्य धोरणाचे कौतुक केले आहे.
.jpeg)
