अर्सला खान
मोहरमच्या निमित्ताने देशाच्या विविध भागांतून समोर आलेले काही व्हिडिओ सध्या सोशल मीडियावर प्रचंड चर्चेचा विषय बनले आहेत. या व्हिडिओंमध्ये हिंदू आणि मुस्लिम समुदायातील लोकांमध्ये असलेला जिव्हाळा, आदर आणि सामाजिक सलोख्याची सुंदर झलक पाहायला मिळत आहे. एकीकडे मोहरमचा हा सण इमाम हुसैन यांच्या पवित्र शहादतच्या (बलिदान) स्मरणार्थ पाळला जातो. दुसरीकडे याच निमित्ताने समोर आलेल्या काही फोटोंनी भारताची पारंपारिक गंगा-जमुनी संस्कृती पुन्हा एकदा जगासमोर आणली आहे.
उत्तर प्रदेशातील गोंडा येथून व्हायरल झालेल्या एका व्हिडिओमध्ये काही लोक मोहरमच्या मिरवणुकीत सामील झालेल्या नागरिकांवर अत्यंत प्रेमाने आणि आदराने फुलांचा वर्षाव करताना दिसत आहेत. हे सुंदर दृश्य लोकांना कमालीचे प्रभावित करत आहे. याच धर्तीवर सोशल मीडियावरील एका युजरने आपल्या अकाउंटवर एक व्हिडिओ शेअर केला आहे. यामध्ये काही हिंदू बांधव दुलदुलला (मिरवणुकीतील घोडा) अत्यंत श्रद्धेने भोजन म्हणजेच नैवेद्य भरवताना पाहायला मिळत आहेत. या व्हिडिओमधून धार्मिक भेदभावाच्या पलीकडे जाऊन एकमेकांबद्दलचा आदर आणि प्रेमाचा एक मोलाचा संदेश मिळतो.
तसेच जम्मू-काश्मीरमधील श्रीनगर येथील ऐतिहासिक लाल चौकातूनही असाच एक काळजाला भिडणारा व्हिडिओ समोर आला आहे. या व्हिडिओमध्ये मोहरमच्या मिरवणुकीदरम्यान हिंदू आणि मुस्लिम समाजाचे लोक खांद्याला खांदा लावून एकत्र चालताना दिसत आहेत. मिरवणुकीतील लोक इमाम हुसैन यांच्या बलिदानाचा सार्थ अभिमान बाळगत कर्बलाचा शांतता संदेश पुढे घेऊन जात आहेत. काश्मीरच्या या सामायिक संस्कृतीमध्ये सर्व धर्मीयांचा सहभाग असणे ही काही नवीन गोष्ट नाही, असे येथील स्थानिक नागरिकांचे म्हणणे आहे. ही परंपरा पूर्वजांपासून चालत आलेली असून या संस्कृतीचा हा एक अविभाज्य भाग आहे.
अनेक सोशल मीडिया युजर्सनी यावर आपल्या भावना व्यक्त केल्या आहेत. इमाम हुसैन यांचा मूळ संदेश हा माणुसकी, न्याय आणि अन्यायाविरुद्ध लढा देण्याचा आहे. त्यामुळे त्यांच्या या बलिदानाचा आदर राखण्यासाठी सर्वच समुदायांनी पुढे येणे अत्यंत स्वाभाविक आहे, असे मत लोकांनी नोंदवले आहे. भारताची हीच धार्मिक विविधता त्याची सर्वात मोठी ताकद आहे आणि असे सण या ताकदीला अधिक मजबूत करतात, अशा शब्दांत काहींनी या व्हिडिओंचे कौतुक केले आहे.
मोहरमची सर्वात मोठी शिकवण कर्बलाच्या त्या ऐतिहासिक घटनेतून मिळते. तिथे इमाम हुसैन यांनी सत्य आणि न्यायाच्या रक्षणासाठी स्वतःच्या प्राणांची आहुती दिली होती. याच कारणामुळे त्यांच्या बलिदानाचा हा संदेश केवळ एका विशिष्ट समुदायापुरता मर्यादित मानता येत नाही. गोंडापासून ते श्रीनगरपर्यंत समोर आलेली ही दृश्ये याच उदात्त संदेशाची प्रचिती देतात. धर्म वेगवेगळे असू शकतात, पण माणुसकी, आदर आणि आपुलकी सर्वांना एकत्र बांधण्याचे काम करते, हेच यातून सिद्ध होते.
सोशल मीडियावर या व्हिडिओंना मिळणारा सकारात्मक प्रतिसाद समाजमनाची खरी ओळख करून देतो. आजच्या काळातही लोकांच्या मनात सलोखा, एकता आणि एकमेकांबद्दलचा आदर जिवंत आहे, हेच यातून दिसून येते. मोहरमच्या निमित्ताने समोर आलेली ही चित्रे केवळ धार्मिक आस्थेचे प्रतीक नाहीत, तर ती भारताच्या सामायिक संस्कृतीचे आणि सामाजिक एकतेचे एक सुंदर नंदनवन आहेत.
.jpeg)
.jpg "खीर भवानी मंदिरात प्रार्थना करणारी एक महिला. सर्व छायाचित्रे बासित जरगर")
.jpg "भारतीय सशस्त्र दलांनी देशभरात साजरा केला आंतरराष्ट्रीय योग दिन")