नवी दिल्ली 

भारताच्या यजमानतेखाली वीकेंडला 'भारत मंडपम' येथे होणाऱ्या १८ व्या 'ब्रिक्स' (BRICS) शिखर परिषदेच्या पार्श्वभूमीवर नवी दिल्लीत कडक सुरक्षा व्यवस्था लागू करण्यात आली आहे. जागतिक नेत्यांच्या आगमनामुळे राजधानीत हाय अलर्ट घोषित करण्यात आला असून, सुमारे १५ हजार दिल्ली पोलीस कर्मचारी, २०० निमलष्द दलाच्या कंपन्या आणि ५०० हून अधिक सीसीटीव्ही कॅमेऱ्यांच्या निगराणीखाली संपूर्ण शहर ठेवण्यात आले आहे.

दिल्ली वाहतूक पोलिसांनी स्पष्ट केले आहे की शहरात कोणतीही पूर्ण बंदी (shutdown) नसली, तरी व्हीव्हीआयपी ताफ्यांच्या मार्गावर तात्पुरते थांबवणे, वळण आणि निर्बंध असणार आहेत. रशियन राष्ट्राध्यक्ष व्लादिमीर पुतिन शुक्रवारीच दिल्लीत दाखल झाले आहेत, तर चीनचे राष्ट्राध्यक्ष शी जिनपिंग सात वर्षांनंतर या परिषदेसाठी येत आहेत. याशिवाय इराण, दक्षिण आफ्रिका, इजिप्तचे राष्ट्रपती आणि संयुक्त राष्ट्रसंघाचे सरचिटणीस अँटोनिओ गुटेरेस यांच्यासह अनेक जागतिक दिग्गज नेते या परिषदेत सहभागी होत आहेत.

वाहतूक नियमन आणि नागरिकांसाठी मार्गदर्शक सूचना

सुरक्षेच्या कारणास्तव मथुरा रोड, सरदार पटेल मार्ग, शांती पथ, जनपथ, अशोका रोड यांसह ३५ हून अधिक प्रमुख रस्ते प्रभावित होऊ शकतात. नोएडाहून मध्य दिल्ली, पूर्व दिल्ली आणि द्वारकेहून विमानतळाकडे जाणाऱ्या प्रवाशांना वाहतूक बदलांचा सामना करावा लागू शकतो. आपत्कालीन सेवा सुरू राहतील, मात्र परीक्षा किंवा रुग्णालयांच्या कामासाठी जाणाऱ्या नागरिकांनी पुरेसा वेळ हातात ठेवून प्रवास करण्याचे आवाहन पोलिसांनी केले आहे. सोशल मीडियावरील अफवांवर विश्वास न ठेवता केवळ अधिकृत अपडेट्सवर अवलंबून राहण्याचे निर्देश देण्यात आले आहेत.