संयुक्त राष्ट्रांच्या व्यासपीठावरून काश्मीर मुद्द्यावर भारताविरुद्ध अपप्रचार करणाऱ्या पाकिस्तानला, भारताने त्यांच्याच इतिहासातील काळे सत्य दाखवत अक्षरशः निरुत्तर केले आहे. "ज्या देशाच्या सैन्याने आणि धार्मिक संघटनांनी १९७१ मध्ये ४ लाख महिलांवर बलात्कार करण्यास परवानगी दिली होती, त्यांनी आम्हाला मानवाधिकाराचे धडे देऊ नयेत," अशा कठोर शब्दांत भारताने पाकिस्तानला सुनावले.

पाकिस्तानचे काळजीवाहू पंतप्रधान अन्वर-उल-हक काकर यांनी संयुक्त राष्ट्रात काश्मीरचा मुद्दा उपस्थित केल्यानंतर, भारताने 'राईट ऑफ रिप्लाय'चा (Right of Reply) वापर करत पाकिस्तानच्या खोट्या प्रचाराची पोलखोल केली. भारताचे प्रतिनिधी अंजनी कुमार यांनी पाकिस्तानला त्यांच्या रक्तरंजित इतिहासाचा आरसा दाखवला.

अंजनी कुमार म्हणाले, "पाकिस्तानने १९७१ मध्ये तत्कालीन पूर्व पाकिस्तानात (आताचा बांग्लादेश) घडवून आणलेला नरसंहार जग विसरलेले नाही. 'ऑपरेशन सर्चलाइट'च्या नावाखाली पाकिस्तानी लष्कराने ३० लाख लोकांची हत्या केली आणि ४ लाखांहून अधिक महिलांवर अनन्वित अत्याचार केले. ज्यांचा स्वतःचा इतिहास इतका क्रूर आहे, त्यांना दुसऱ्यांवर बोट दाखवण्याचा कोणताही नैतिक अधिकार नाही."

भारताने पुढे म्हटले की, "पाकिस्तान हे 'दहशतवाद्यांचे आश्रयस्थान' आहे आणि ओसामा बिन लादेनसारख्या दहशतवाद्यांना त्यांनीच आश्रय दिला होता. त्यांनी भारताविरुद्ध बोलण्यापेक्षा आपल्या देशातील हिंदू, शीख आणि ख्रिश्चन अल्पसंख्याकांवर होणाऱ्या अत्याचारांकडे लक्ष द्यावे."

भारताच्या या आक्रमक आणि ठोस उत्तरामुळे, आंतरराष्ट्रीय मंचाचा गैरवापर करण्याच्या पाकिस्तानच्या प्रयत्नांना पुन्हा एकदा सुरुंग लागला आहे आणि त्यांची जागतिक स्तरावर नाचक्की झाली आहे.