लखनऊ 

भारतात वापरल्या जाणाऱ्या इलेक्ट्रॉनिक व्होटिंग मशीनमध्ये (EVM) कोणतेही इंटरनेट, ब्लूटूथ किंवा वाय-फाय नेटवर्क कनेक्टिव्हिटी नसते आणि त्या पूर्णपणे सुरक्षित आहेत, असे स्पष्टीकरण भारताचे मुख्य निवडणूक आयुक्त ज्ञानेश कुमार यांनी दिले आहे. लखनऊ येथील दोन दिवसीय दौऱ्यादरम्यान ऐतिहासिक कॉल्विन तालुकदार्स कॉलेजमधील विद्यार्थ्यांशी साधलेल्या संवादादरम्यान त्यांनी ही माहिती दिली.

निवडणूक प्रक्रियेची पारदर्शकता, लोकशाही व्यवस्था आणि ईव्हीएमच्या विश्वासार्हतेबाबत बोलताना मुख्य निवडणूक आयुक्तांनी सांगितले की, भारतीय ईव्हीएमचे उत्पादन देशातील सार्वजनिक क्षेत्रातील उपक्रमांद्वारे (PSUs) केले जाते. या मशिन्स कोणत्याही बाह्य वायरलेस तंत्रज्ञानाशी जोडलेल्या नसतात. त्यामुळे सोशल मीडियावरील कोणत्याही माहितीवर विश्वास ठेवण्यापूर्वी तिची सत्यता आणि मूळ स्रोत तपासून पाहणे अत्यंत आवश्यक आहे, असा सल्लाही त्यांनी तरुणांना दिला.

तरुणांनी लोकशाही प्रक्रियेत सक्रिय व्हावे

भारतामध्ये सुमारे १०० कोटी मतदार असून एवढ्या मोठ्या प्रमाणावर निवडणूक प्रक्रिया पार पाडणे हे एक मोठे आव्हान असते. या प्रक्रियेत तरुणी आणि तरुणांची भूमिका सर्वाधिक महत्त्वाची आहे, असे मत मुख्य निवडणूक आयुक्तांनी व्यक्त केले. वयाची १८ वर्षे पूर्ण केलेल्या प्रत्येक नागरिकाने मतदार म्हणून नोंदणी केली पाहिजे, असे आवाहन त्यांनी केले.

राजकीय पक्षांचे प्रतिनिधी, उमेदवार आणि त्यांच्या एजंट्सच्या उपस्थितीत निवडणूक प्रक्रियेचे वेळोवेळी ऑडिट केले जाते, ज्यामुळे यंत्रणेची पारदर्शकता टिकून राहते. महाविद्यालयांमध्ये कार्यरत असलेल्या 'इलेक्टोरल लिटरसी क्लब'च्या (ELC) माध्यमातून विद्यार्थ्यांमध्ये निवडणूक प्रक्रियेविषयी जागरूकता निर्माण करण्याचे प्रयत्न सुरू असल्याचे त्यांनी नमूद केले.