नवी दिल्ली 

दुबईहून तेल अवीव जाणाऱ्या 'फ्लाईदुबई' (flydubai) विमानाचा मोठा अपघात टळल्याची घटना समोर आली आहे. विमानाचा सह-वैमानिक (co-pilot) कथितपणे विमान पाडण्याचा प्रयत्न करत असताना, त्याला धैर्याने रोखून शंभरहून अधिक प्रवाशांचे प्राण वाचवणारे भारतीय पायलट कॅप्टन स्मित मच्छहर (Captain Smit Machchhar) यांना पंतप्रधान नरेंद्र मोदी यांनी 'हिरो' म्हटले आहे. भारताला त्यांच्या या शौर्याचा सार्थ अभिमान असल्याचे पंतप्रधान म्हणाले.

गंभीर दुखापत असूनही दाखवले अफाट धाडस

पंतप्रधान नरेंद्र मोदी यांनी 'एक्स' (X) वर पोस्ट करत पायलट स्मित मच्छहर यांच्या धाडसाचे कौतुक केले. अत्यंत धोकादायक परिस्थितीत आणि गंभीर दुखापत झालेली असतानाही कॅप्टन मच्छहर यांनी इतरांचे प्राण वाचवण्यासाठी अपार धैर्य आणि अतूट संकल्पशक्ती दाखवली, असे मोदींनी नमूद केले.

"कॅप्टन स्मित मच्छहर हे एक खरे हिरो आहेत," असे पंतप्रधान मोदींनी आपल्या पोस्टमध्ये म्हटले आहे. त्यांच्या या शौर्यामुळे शेकडो लोकांचे प्राण वाचले आणि एक मोठी शोकांतिका टळली. भारताला कॅप्टन मच्छहर यांच्यावर गर्व आहे, असे सांगत पंतप्रधानांनी त्यांच्या प्रकृतीत लवकरात लवकर सुधारणा होण्यासाठी आणि त्यांना दीर्घायुष्य लाभण्यासाठी प्रार्थना केली आहे.