भारतीय हवामान विभागाने (IMD) शेअर केलेल्या उपग्रह फोटोंनुसार, शुक्रवारी उत्तर-पश्चिम भारत आणि पाकिस्तानवर १,००० किलोमीटर लांबीचे ढगांचे पट्टे पसरलेले दिसले आहेत. हे ढग या भागात पावसाचे आगमन होणार असल्याचे संकेत देत आहेत.
पूर्व इराण आणि लगतच्या अफगाणिस्तानवर गुरुवारपासून सक्रिय असलेला वेस्टर्न डिस्टर्बन्स, पूर्व राजस्थानवरील चक्रीय वाऱ्याची स्थिती आणि पूर्व राजस्थानपासून पूर्व-मध्य अरबी समुद्रापर्यंत पसरलेला कमी दाबाचा पट्टा यामुळे हवामानात मोठे बदल होण्याची शक्यता आहे. ही मोठी हवामान प्रणाली पूर्वेकडे सरकत असून यामुळे उत्तर-पश्चिमेकडील बहुतांश राज्यांमध्ये पाऊस, मेघगर्जना आणि जोरदार वारे वाहतील. यामध्ये शुक्रवारी जम्मू-काश्मीर, हिमाचल प्रदेश, पंजाब, हरियाणा आणि राजस्थानचा समावेश असेल. शनिवारी हा प्रभाव उत्तराखंड, उत्तर प्रदेश, मध्य प्रदेश आणि छत्तीसगडपर्यंत पसरेल.
या राज्यांमध्ये ८ एप्रिलपर्यंत बहुतांश दिवस पाऊस आणि वादळी वारे पाहायला मिळतील. पूर्व झारखंडपासून दक्षिण छत्तीसगडपर्यंत असलेल्या एका स्वतंत्र कमी दाबाच्या पट्ट्यामुळेही हवामानात हालचाली होत आहेत. तसेच ७ एप्रिलपासून एका नवीन 'वेस्टर्न डिस्टर्बन्स'चा प्रभाव उत्तर-पश्चिम भारतावर पडण्याची शक्यता आहे. या पावसामुळे वाढत्या उष्णतेपासून दिलासा मिळेल, परंतु उभ्या पिकांचे नुकसान होऊ शकते. त्यामुळे शेतकऱ्यांनी सतर्क राहावे, असा सल्ला देण्यात आला आहे.
दिल्लीमध्ये हवामानात आधीच अचानक बदल झाला असून शहर आणि आसपासच्या परिसरात धुळीचे लोट पाहायला मिळत आहेत. हवामान विभागाच्या सकाळच्या बुलेटिननुसार, "पुढील २४ तासांत दिल्ली आणि लगतच्या एनसीआर भागात ४०-५० किमी प्रतितास वेगाने वारे वाहतील आणि मेघगर्जनेसह विजांचा कडकडाट होण्याची शक्यता आहे." दिल्ली-एनसीआरमधील पावसाचा हा जोर विकेंडलाही कायम राहील.
हवामान विभागाने शनिवारी येलो अलर्ट जारी केला असून दुपार आणि संध्याकाळच्या वेळी २० ते ३० किमी प्रतितास वेगाने वारे वाहतील. वाऱ्याचा हा वेग ४० किमी प्रतितासपर्यंत पोहोचू शकतो, तसेच विजांच्या कडकडाटासह हलका पाऊस पडण्याची शक्यता वर्तवण्यात आली आहे. भोपाळ येथील हवामान केंद्राने ५ एप्रिलपर्यंत मध्य प्रदेशच्या मोठ्या भागात मेघगर्जना, विजांचा कडकडाट, वादळी वारे आणि गारपिटीचा इशारा दिला आहे.
.jpeg)
