नवी दिल्ली 

पश्चिम आशियातील संघर्षामुळे निर्माण झालेली ऊर्जा संकटजन्य परिस्थिती आता निवळत चालली आहे. याच पार्श्वभूमीवर केंद्र सरकारने हॉटेल, रेस्टॉरंट आणि इतर व्यावसायिक ग्राहकांसाठी एलपीजी पुरवठा पुन्हा एकदा पूर्ववत केला आहे. पेट्रोलियम मंत्रालयाने गुरुवारी यासंदर्भात अधिकृत घोषणा केली असून, व्यावसायिक एलपीजीवर लादलेले सर्व निर्बंध मागे घेण्यात आले आहेत.

पुरवठ्यातील सुधारणा

पेट्रोलियम मंत्रालयाने दिलेल्या निवेदनानुसार, देशांतर्गत उत्पादन वाढल्याने आणि एलपीजीच्या आयातीचे शिपमेंट्स नियमित होऊ लागल्याने हा निर्णय घेण्यात आला आहे. संघर्ष सुरू असताना घरगुती गॅसची उपलब्धता सुनिश्चित करण्यासाठी सरकारने व्यावसायिक एलपीजी पुरवठ्यावर काही प्रमाणात मर्यादा आणल्या होत्या. आता ही स्थिती सुधारल्याने बल्क एलपीजीचा पुरवठाही पूर्ववत करण्यात आला आहे.

उद्योगांना मोठा दिलासा

या निर्णयामुळे औद्योगिक आणि व्यावसायिक ग्राहकांना मोठा दिलासा मिळाला आहे. संकटाच्या काळात सरकारने अत्यावश्यक वस्तू कायद्यांतर्गत रिफायनरींना पेट्रोकेमिकल उत्पादनांऐवजी एलपीजी उत्पादनावर भर देण्याचे निर्देश दिले होते. आता परिस्थिती सुधारल्यामुळे रिफायनरींना पुन्हा पेट्रोकेमिकल उत्पादनासाठी फीडस्टॉक वापरण्यास परवानगी दिली जाणार आहे, मात्र घरगुती वापरासाठी दररोज ४०,००० टनांपेक्षा जास्त उत्पादन कायम राखले जाईल.

याशिवाय, सरकारने भविष्यात व्यावसायिक आणि औद्योगिक ग्राहकांना पाइप नॅचरल गॅसकडे (PNG) वळवण्यावर भर देण्याचे पुन्हा एकदा स्पष्ट केले आहे. सरकारी तेल विपणन कंपन्यांना (OMCs) व्यावसायिक ग्राहकांचा डेटाबेस तयार करण्याचे निर्देश देण्यात आले आहेत, जेणेकरून भविष्यातील पुरवठ्याचे नियोजन अधिक प्रभावीपणे करता येईल.