भुवनेश्वर

नीट (NEET) पेपर लीक प्रकरणावरून झालेल्या तीव्र आंदोलनादरम्यान जेन झी (Gen Z) मधील विद्यार्थ्यांना 'दिशाभूल' करण्याचे प्रयत्न झाले, ज्यामुळे आपण केंद्रीय शिक्षण मंत्री पदाचा राजीनामा दिल्याचा खुलासा वरिष्ठ भाजप नेते आणि खासदार धर्मेन्द्र प्रधान यांनी केला आहे. दिल्लीतील जंतरमंतरवरील आंदोलनानंतर राजीनामा दिल्याच्या दोन आठवड्यांनी त्यांनी प्रथमच यावर भाष्य केले आहे.

भुवनेश्वर येथील जीएम विद्यापीठात विद्यार्थी आणि शिक्षकांशी संवाद साधताना प्रधान म्हणाले की, "जेन झी ही आपलीच मुले आहेत. काही लोकांनी त्यांना दिशाभूल करण्याचा प्रयत्न केला. मला त्या पदाबद्दल कोणताही मोह नव्हता." भारताची तरुण पिढी ही देशाला 'विश्व गुरु' बनवणार असून, माझ्यासाठी पद कधीही महत्त्वाचे नव्हते, असे त्यांनी स्पष्ट केले. दरम्यान, संबलपूरमधील एका कार्यक्रमात बोलताना त्यांनी बीजेडी अध्यक्ष नवीन पटनायक यांच्यावरही जोरदार निशाणा साधला.

नवीन पटनायक यांच्या टीकेला प्रत्युत्तर

संबलपूरमध्ये विरोधकांकडून करण्यात आलेल्या 'गो बॅक'च्या घोषणांवर बोलताना प्रधान म्हणाले की, मी एका शेतकऱ्याचा मुलगा आहे, तुम्ही मला परत जाण्यास सांगितले तरी मी मागे हटणार नाही. दुसरीकडे, बीजेडी नेते रोहित पुजारी यांनी धर्मेन्द्र प्रधान यांच्यावर पलटवार करताना म्हटले की, विद्यार्थ्यांवरील लाठीचार्ज आणि चुकीच्या धोरणांमुळेच प्रधान यांना राजीनामा द्यावा लागला असून यासाठी त्यांनी इतरांवर आरोप करू नये.