नवी दिल्ली
मतदार यादीच्या देशव्यापी विशेष सखोल पुनरीक्षण (SIR) मोहिमेदरम्यान दोन निवडणूक आयुक्तांनी विविध राज्यांतून नावे वगळण्यासह अनेक मुद्द्यांवर आक्षेप नोंदवले होते. मात्र, निवडणूक आयोगाचे सर्व निर्णय एकमतानेच घेण्यात आल्याचे अधिकाऱ्यांनी बुधवारी स्पष्ट केले.
एका मीडिया अहवालात दावा करण्यात आला होता की, एसआयआर (SIR) प्रक्रियेदरम्यान निवडणूक आयुक्त सुखबीर सिंग संधू आणि विवेक जोशी यांनी १० महिन्यांत १४ वेळा निवडणूक आयोगाच्या पावलांवर आक्षेप घेतला होता. यावर उत्तर देताना अधिकाऱ्यांनी स्पष्ट केले की, मतदार यादी शुद्धीकरण मोहिमेदरम्यान विविध राज्यांतून नावे वगळणे आणि मतदार डेटा हाताळण्याबाबत या आयुक्तांनी काही मुद्द्यांवर प्रश्न उपस्थित केले होते.
मुख्य निवडणूक आयुक्तांसह दोन्ही निवडणूक आयुक्तांच्या मंजुरीने आणि एकमतानेच आयोगाचे सर्व निर्णय घेण्यात आल्याचे निवडणूक आयोगाच्या सूत्रांनी स्पष्ट केले. निवडणूक आयोगाच्या कारभाराचे नियमन करणाऱ्या कायद्यानुसार आणि सर्वोच्च न्यायालयाच्या निकालानुसार, शक्यतो सर्व निर्णय एकमताने घेतले जावेत आणि गरज भासल्यास बहुमताचा विचार व्हावा, असे नमूद करण्यात आले आहे. दरम्यान, या मुद्द्यावरून विरोधी पक्षांनी भाजप आणि त्याच्या मित्रपक्षांना अनुकूल नसलेल्या मतदारांना लक्ष्य केल्याचा आरोप करत निवडणूक आयोगावर टीका केली आहे.
.jpeg)
