मुंबई
प्रसिद्ध स्टँड-अप कॉमेडियन वीर दास याने आपल्या 'वीर दास: फूल व्हॉल्यूम' या नेटफ्लिक्स स्पेशल शोसाठी तिसऱ्यांदा प्रतिष्ठित आंतरराष्ट्रीय एमी पुरस्काराचे नामांकन मिळवले आहे. या प्रतिष्ठित टेलिव्हिजन पुरस्कारांसाठी तीन नामांकने मिळवणारा तो पहिला भारतीय कलाकार ठरला आहे.
वीर दासने यापूर्वी २०२१ मध्ये 'फॉर इंडिया'साठी आणि २०२३ मध्ये 'लँडिंग'साठी एमी नामांकन मिळवले होते, ज्यापैकी 'लँडिंग' शोसाठी त्याने आंतरराष्ट्रीय एमी पुरस्कार जिंकला होता. याशिवाय २०२४ च्या सोहळ्यात त्याने सूत्रसंचालनही केले होते.
'फूल व्हॉल्यूम' या शोबाबत बोलताना वीर दास म्हणाला की, "एका अशा शोसाठी एमी नामांकन मिळणे आश्चर्यकारक आहे, ज्याची निर्मिती मी माझा आवाज गमावलेल्या काळात केली होती. शांततेतून सुरू झालेला हा प्रवास इथवर पोहोचणे हा एक अद्भूत अनुभव आहे."
जुलै २०२५ मध्ये नेटफ्लिक्सवर प्रदर्शित झालेला हा शो मुंबई, लंडन आणि न्यूयॉर्क येथे शूट करण्यात आला होता. शूटिंगपूर्वीच आपला आवाज गमावल्यामुळे वीर दासने हा शो शांततेत पुन्हा लिहिला आणि मोठ्या प्रमाणावर सरावाविना सादर केला. या आव्हानाचे रूपांतर त्याने शांतता, आनंद आणि स्वतःचा आवाज शोधण्याच्या थीममध्ये केले.
