नवी दिल्ली
कोळसा ब्लॉक वाटप प्रकरणात सर्वोच्च न्यायालयाने माजी पंतप्रधान मनमोहन सिंग यांना क्लीन चिट दिल्यानंतर, काँग्रेस नेत्या सोनिया गांधी यांनी केंद्र सरकारवर जोरदार निशाणा साधला आहे. इतिहास मनमोहन सिंग यांना एक शांत, संयमी आणि देशाचे सर्वात महत्त्वाचे पंतप्रधान म्हणून नक्कीच आदराने स्मरण ठेवेल, असे सोनिया गांधी यांनी म्हटले आहे. एका वृत्तपत्रात लिहिलेल्या लेखात त्यांनी मनमोहन सिंग यांच्यावरील भ्रष्टाचाराचे आरोप राजकीय हेतूने प्रेरित असल्याचा दावा केला आहे.
सोनिया गांधी यांनी म्हटले की, मनमोहन सिंग यांच्या प्रामाणिकपणावर आणि सचोटीवर करण्यात आलेले आरोप पूर्णपणे निराधार ठरले आहेत. सर्वोच्च न्यायालयाच्या निकालानंतर त्यांच्यावरील राजकीय सुडाचा अंत झाला असून, सिंग यांचा प्रामाणिकपणा आणि उत्तरदायित्वाचा रेकॉर्ड नरेंद्र मोदी सरकारच्या कार्यपद्धतीपेक्षा पूर्णपणे वेगळा आहे. मोदी सरकारने नेहमीच केंद्रीय तपास यंत्रणांचा गैरवापर केल्याचा आरोप त्यांनी केला.
UPA सरकारच्या १० वर्षांच्या काळात भारताने अभूतपूर्व आर्थिक वृद्धी साधली आणि दीड दशकांत लाखो लोकांना गरिबीतून बाहेर काढले, असे सोनिया गांधींनी नमूद केले. शिक्षण हक्क कायदा, मनरेगा, वन हक्क कायदा आणि अन्न सुरक्षा कायदा यांसारख्या लोककल्याणकारी योजनांचा लाभ तळागाळातील लोकांपर्यंत पोहोचवण्यात आला. तसेच भारत-अमेरिका अणुकरार हा त्यांच्या राजकीय धैर्याचे आणि मुत्सद्देगिरीचे उत्तम उदाहरण असल्याचे त्यांनी सांगितले.
.jpeg)
