कुलगाम चकमक : २५ मुली आणि २ शिक्षकांची सुखरूप सुटका; लष्कर-ए-तोयबाचा म्होरक्या भट ठार

Story by  आवाज़ मराठी | Published by  Mrudgandha Dixit • 21 m ago
कुलगाम चकमक: २५ मुली व २ शिक्षकांची सुखरूप सुटका
कुलगाम चकमक: २५ मुली व २ शिक्षकांची सुखरूप सुटका

 

कुलगाम

जम्मू-काश्मीरच्या कुलगाम जिल्ह्यात बुधवारी तणावाचे वातावरण निर्माण झाले होते. लष्कर-ए-तोयबाचा (LeT) म्होरक्या मोहम्मद लतीफ भट हा एका मशिदीत लपला होता. सुरक्षा दलाचे जवान त्याच्यावर अंतिम कारवाई करण्याच्या तयारीत होते. नेमक्या त्याच वेळी या मशिदीला लागून असलेल्या "दारुल उलूम" या शैक्षणिक संस्थेत २५ मुली आणि २ शिक्षक अडकल्याची माहिती समोर आली.

मशिदीतून दहशतवाद्याचा गोळीबार सुरू होता. या गोळीबाराची पर्वा न करता लष्कराच्या ९ राष्ट्रीय रायफल्सच्या एका अधिकाऱ्याने स्वतःहून पुढे येण्याची तयारी दाखवली. आपल्या एका सहकाऱ्यासोबत त्यांनी शेजारच्या मदरशात प्रवेश केला. त्यांनी या सर्व २७ नागरिकांना सुखरूप बाहेर काढले.

सर्व नागरिक सुरक्षित ठिकाणी पोहोचल्यावर ९ राष्ट्रीय रायफल्स आणि जम्मू-काश्मीर पोलिसांच्या स्पेशल ऑपरेशन्स ग्रुपने (SOG) अंतिम कारवाई सुरू केली. दहशतवाद्याला बाहेर काढण्यासाठी जवानांनी मशिदीत अश्रुधुराच्या नळकांड्या फोडल्या. तो पळून जाऊ नये यासाठी घेराबंदी केली होती. या कारवाईत धार्मिक वास्तूला कोणतेही नुकसान पोहोचू नये याची पूर्ण काळजी घेण्यात आली. जवानांनी पूर्ण संयम राखत ही मोहीम फत्ते केली. मोहीम यशस्वी झाल्यानंतर नॉर्दर्न आर्मी कमांडर लेफ्टनंट जनरल प्रतीक शर्मा (जीओसी-इन-सी) यांनी दक्षिण काश्मीरमध्ये जाऊन जवानांची भेट घेतली.

अधिकाऱ्यांनी या कारवाईचा तपशील दिला. गुप्तचर माहिती मिळाल्यानंतर शोध पथकाने स्थानिक नागरिकांना सोबत घेऊन मशिदीत प्रवेश केला. त्यांना वरच्या मजल्यावरील एक खोली आतून बंद असल्याचे दिसले. आतील व्यक्तीला बाहेर येण्यास सांगितले असता त्याने गोळीबार सुरू केला. यावरून आत लपलेला दहशतवादी भटच असल्याची खात्री पटली. भटच्या डोक्यावर १५ लाख रुपयांचे बक्षीस जाहीर केले होते.

भट याआधी अनेकदा सुरक्षा दलांच्या हातावर तुरी देऊन निसटला होता. या वेळी त्याला निसटू द्यायचे नाही, असा निश्चय दक्षिण काश्मीरमधील वरिष्ठ लष्करी अधिकाऱ्यांनी केला होता. यापूर्वी ८ जुलै रोजी शोपियानमध्ये झालेल्या चकमकीतून तो पळून गेला होता. त्या चकमकीत झाकीर नावाचा दुसरा दहशतवादी मारला गेला होता. त्यानंतर ११ नोव्हेंबर रोजी भट आणि त्याचा साथीदार उमर नासिर दार यांनी कुलगाममधील सीआरपीएफच्या चौकीवर हल्ला केला. या हल्ल्यात तीन जवान जखमी झाले होते. या घटनेनंतर सुरक्षा दलांनी कुलगामसह शेजारच्या शोपियान आणि अनंतनाग जिल्ह्यांत शोधमोहीम सुरू केली.

या मोहिमेसाठी लष्कर, एसओजी आणि सीआरपीएफचे सुमारे २,००० जवान तैनात करण्यात आले होते. त्यांच्या मदतीला मोबाईल बंकर कमांड पोस्ट (MBCP) होती. ठराविक भागांचे गट पाडून ही शोधमोहीम राबवली गेली. एका वरिष्ठ अधिकाऱ्याने सांगितले, "११ नोव्हेंबरपासून घेराबंदी आणि शोधमोहीम सुरू आहे. काही भागांत लोकसंख्येची घनता जास्त असल्याने शोधकार्य पूर्ण करायला आम्हाला जवळपास तीन दिवस लागले." या मोहिमेमुळे सामान्य नागरिकांना थोडा त्रास झाला असला तरी जवानांकडून कोणत्याही अतिरेकी कारवाईची तक्रार आली नाही, असेही या अधिकाऱ्याने नमूद केले.

भट हा शालेय शिक्षण पूर्ण केलेला तरुण होता आणि पूर्वी सुतारकाम करायचा. विशीच्या सुरुवातीला असलेला भट नोव्हेंबर २०२५ मध्ये याच दिवशी बेपत्ता झाला होता. त्यानंतर तो लष्कर-ए-तोयबा आणि त्याच्याशी संबंधित "द रेझिस्टन्स फ्रंट" (TRF) या संघटनेत सामील झाला. दक्षिण काश्मीरमधील अनेक दहशतवादी घटनांमध्ये तो मुख्य संशयित होता. २२ जुलै रोजी अनंतनागमध्ये इंडियन रिझर्व्ह पोलीसचे हवालदार आशिक हुसेन कुरेशी यांची हत्या झाली होती. तसेच ३१ जुलै रोजी कुलगाममध्ये छत्तीसगडमधील दोन परप्रांतीय मजुरांची निवडून हत्या करण्यात आली होती. या दोन्ही घटनांमागे भटचा हात असल्याचे सुरक्षा यंत्रणांनी सांगितले.