नवी दिल्ली 

मुख्य निवडणूक आयुक्तांच्या विरोधात आज (शुक्रवारी) दिल्ली आणि मुंबईत निदर्शने व आंदोलने आयोजित करण्यात आली आहेत. निवडणूक आयोगातील कथित अंतर्गत वाद आणि मतदारयाद्यांच्या विशेष कसूरवार पुनरावलोकनावरून (SIR) मुख्य निवडणूक आयुक्त ज्ञानेश कुमार यांच्या राजीनाम्याची मागणी करण्यासाठी 'कॉकरेज जनता पार्टी' (CJP) आणि विविध विद्यार्थी संघटनांनी ही आंदोलनाची हाक दिली आहे.

पोलिसांनी नाकारली परवानगी, सुरक्षा वाढवली

CJP कडून मुंबईतील शिवाजी पार्क येथे आंदोलन केले जाणार आहे, तर दिल्लीतील जंतरमंतरवर आम आदमी पार्टी (AAP), आयसा (AISA), एनएसयूआय (NSUI) आणि भारतीय युवक काँग्रेसतर्फे (IYC) निदर्शने केली जाणार आहेत. मात्र, कायदा आणि सुव्यवस्थेचा प्रश्न निर्माण होऊ नये म्हणून दोन्ही शहरांच्या पोलिसांनी या आंदोलनांना परवानगी नाकारली आहे.

दिल्लीतील न्यू दिल्ली जिल्ह्यात भारतीय नागरिक सुरक्षा संहितेच्या (BNSS) कलम १६३ अंतर्गत जमावबंदीचे आदेश लागू करण्यात आले आहेत. या आदेशानुसार विनापरवानगी सार्वजनिक सभा, पाच किंवा अधिक लोकांची जमवाजमव, निदर्शने आणि घोषणाबाजी करण्यास प्रतिबंध करण्यात आला आहे. तसेच सुरक्षेच्या कारणास्तव जंतरमंतरकडे जाणारे रस्ते बहुस्तरीय बॅरिकेट्स लावून बंद करण्यात आले आहेत.

मेट्रो स्थानके बंद आणि प्रशासकीय तयारी

दिल्ली मेट्रोने राजीव चौक, सेंट्रल सचिवालय, जंतरमंतर, जनपथ, पटेल चौक, मंडी हाऊससह ११ मेट्रो स्थानकांच्या प्रवेश आणि निर्गमनाचे दरवाजे पुढील आदेशापर्यंत बंद ठेवले आहेत. CJP चे संस्थापक अभिजित दिपके यांनी प्रसारमाध्यमांशी बोलताना सांगितले की, ज्ञानेश कुमार यांनी राजीनामा द्यावा आणि फौजदारी चौकशीला सामोरे जावे. दरम्यान, निवडणूक आयोगाने यापूर्वीच स्पष्ट केले आहे की, एसआयआरसह सर्व निर्णय तीन सदस्यीय आयोगाने एकमताने घेतले आहेत.