श्रीनगर
केंद्र सरकार आणि मुख्यमंत्री उमर अब्दुल्ला यांनी जम्मू-काश्मीरमध्ये सुरक्षित वातावरण निर्माण करण्यासाठी उचललेल्या पावलांचे कौतुक करत, अमेरिकेने या प्रदेशावरील ट्रॅव्हल अडव्हायझरीचा (प्रवास सल्ला) फेरविचार करण्याचे संकेत दिले आहेत. भारतामधील अमेरिकेचे राजदूत सर्गिओ गोर यांनी बुधवारी श्रीनगर येथे मुख्यमंत्र्यांच्या भेटीनंतर ही माहिती दिली.
दोन दिवसांच्या दौऱ्यावर जम्मू-काश्मीर आणि लडाखमध्ये आलेले राजदूत सर्गिओ गोर यांनी मुख्यमंत्री उमर अब्दुल्ला यांच्या निवासस्थानी त्यांची भेट घेतली. या भेटीदरम्यान दोन्ही नेत्यांमध्ये भारत-अमेरिका संबंध आणि विशेषतः जम्मू-काश्मीरच्या विकासावर सखोल चर्चा झाली. काश्मीर हा भारताचा एक अत्यंत सुंदर भाग असून येथे येणाऱ्या अमेरिकन नागरिकांना निसर्गाचा आनंद घेता यावा, यासाठी ट्रॅव्हल वॉर्निंग डाऊनग्रेड करण्याबाबत विचार केला जाईल, असे गोर यांनी स्पष्ट केले.
मुख्यमंत्री उमर अब्दुल्ला यांनी या भेटीबाबत माहिती देताना सांगितले की, नवी दिल्ली आणि वॉशिंग्टन यांच्यातील संबंध अधिक दृढ करण्यावर तसेच जम्मू-काश्मीरच्या हितासाठी अमेरिका काय करू शकते, यावर सकारात्मक चर्चा झाली. भविष्यात अमेरिकेसोबतचे संबंध अधिक व्यापक आणि प्रगल्भ होतील, असा विश्वास त्यांनी व्यक्त केला. सर्गिओ गोर आपल्या दौऱ्याच्या दुसऱ्या दिवशी गुरुवारी लडाखला भेट देणार आहेत.
.jpeg)
