कोलंबियामधील बुकारामांगा येथे ४ ते १२ जुलै दरम्यान पार पडलेल्या ५६ व्या आंतरराष्ट्रीय भौतिकशास्त्र ऑलिम्पियाडमध्ये (IPhO 2026) भारतीय संघाने इतिहास रचला आहे. या जागतिक स्पर्धेत भारताच्या संघाने पदतालिकेत अव्वल स्थान पटकावले असून, संघातील सर्व पाचही सदस्यांनी सुवर्णपदके जिंकली आहेत.

या सुवर्णविजेत्यांमध्ये कनिष्क जैन, रिद्धेश बेंदले, रिशित गर्ग आणि स्वरीत जोशी हे चार विद्यार्थी राजस्थानच्या कोटा येथील 'एलन करिअर इन्स्टिट्यूट'चे आहेत. तर पाचवा सुवर्णपदक विजेता श्रेष्ठ सुरैया हा महाराष्ट्राचा रहिवासी आहे. या स्पर्धेत जगातील ८७ देशांमधून एकूण ३८१ स्पर्धक सहभागी झाले होते. यामध्ये भारताने चीन, कझाकस्तान, रशिया, दक्षिण कोरिया आणि तैवान यांच्यासोबत संयुक्तपणे पहिले स्थान मिळवले आहे.

विजेत्या विद्यार्थ्यांपैकी कनिष्क जैन हा अमेरिकेतील नामांकित 'मॅसॅच्युसेट्स इन्स्टिट्यूट ऑफ टेक्नॉलॉजी' (MIT) मध्ये उच्च शिक्षणासाठी प्रवेश घेणार आहे. तर रिशित गर्ग आणि रिद्धेश बेंदले यांनी अनुक्रमे आयआयटी मुंबई आणि आयआयटी दिल्ली या भारतातील सर्वोच्च संस्थांमध्ये आपले प्रवेश निश्चित केले आहेत. या संघातील सर्वात तरुण सदस्य असलेला स्वरीत जोशी हा सध्या कोटामध्ये इयत्ता ११ वीचा अभ्यास करत आहे.

पंतप्रधान नरेंद्र मोदी यांनी सोमवारी सोशल मीडिया प्लॅटफॉर्म 'X' वर पोस्ट करून या संपूर्ण संघाचे मनापासून अभिनंदन केले आहे. "आमच्या तरुणांची ही अत्यंत उत्कृष्ट कामगिरी आहे. त्यांचे हे यश म्हणजे आपल्या युवा शक्तीच्या अमर्याद क्षमतेचे आणि विज्ञान व संशोधनाप्रती असलेल्या त्यांच्या आस्थेचे आणखी एक मोठे उदाहरण आहे," अशा शब्दांत पंतप्रधानांनी गौरव केला.